محسن نقوی کی گورنر خیبر پختونخوا کو قیام امن کیلئے ہر ممکن تعاون کی یقین دہانی

محسن نقوی کی گورنر خیبر پختونخوا کو قیام امن کیلئے ہر ممکن تعاون کی یقین دہانی 

اسلام آباد : وفاقی وزیر داخلہ محسن نقوی نے خیبر پختونخوا کے گورنر فیصل کریم کنڈی کو صوبے میں امن و امان کی بحالی کے لیے ہر ممکن تعاون کا یقین دہانی کرا دی ہے۔ دونوں رہنماؤں کے درمیان صوبے کی مجموعی صورتحال، خاص طور پر کرم کے حالیہ واقعات پر تفصیلی گفتگو ہوئی۔

وزیر داخلہ محسن نقوی نے کرم میں اراضی کے تنازع پر ہونے والے جھگڑے پر گہرے افسوس کا اظہار کیا اور کہا کہ بعض عناصر نے اس تنازع کو بڑھا چڑھا کر پیش کیا ہے جس سے صورتحال مزید کشیدہ ہو گئی ہے۔ انہوں نے یقین دلایا کہ حکومت امن کی بحالی کے لیے تمام تر وسائل بروئے کار لائے گی۔

محسن نقوی نے کہا کہ سکیورٹی فورسز نے بھی صورتحال کو قابو کرنے کے لیے موثر اقدامات کیے ہیں اور امن کی کوششوں کو سبوتاژ کرنے والے عناصر کے خلاف سخت کارروائی کی جائے گی۔ انہوں نے کہا کہ خیبر پختونخوا میں امن و امان کا قیام حکومت کی اولین ترجیح ہے۔

دوسری جانب گورنر خیبر پختونخوا نے وفاقی حکومت کی جانب سے ملنے والے تعاون پر شکریہ ادا کیا اور کہا کہ وہ صوبے میں امن و امان کی بحالی کے لیے تمام ممکنہ اقدامات اٹھا رہے ہیں۔