ڈاکٹر ذاکر نائیک کا پاکستان کے دورے کا اعلان

لاہور: نامور مذہبی اسکالر ڈاکٹر ذاکر نائیک نے اپنے بھتیجے شیخ فارق نائیک کے ہمراہ رواں سال پاکستان کا دورہ کرنے کا اعلان کیا ہے۔ پاکستان میں شیڈول کے مطابق کراچی، لاہور اور اسلام آباد میں عوامی اجتماعات سے خطاب کریں گے۔

سوشل میڈیا پر ڈاکٹر ذاکر نائیک کے آفیشل اکاؤنٹ سے جاری ایک پوسٹ میں اعلان کیا گیا کہ حکومت پاکستان کی دعوت پر ڈاکٹر ذاکر نائیک اور شیخ فارق نائیک دورہ پاکستان کریں گے۔

ڈاکٹر ذاکر نائیک 5-6 اکتوبر کو کراچی، 12-13 اکتوبر کو لاہور اور 19-20 اکتوبر کو اسلام آباد میں عوامی اجتماعات سے خطاب کریں گے۔ ان کے خطاب مذہبی ٹی وی چینل پیس ٹی وی سے براہ راست نشر کیے جائیں گے۔ 

اس سے قبل پاکستانی یوٹیوبر نادر علی کے پوڈکاسٹ میں ڈاکٹر ذاکر نائیک نے جلد ہی پاکستان کا دورہ کرنے کی خواہش کا اظہار کیا تھا۔ ان کا کہنا تھا کہ وہ 2020 میں پاکستان کے دورے کی منصوبہ بندی کر رہے تھے لیکن کورونا وبا کی وجہ سے وہ پاکستان نہیں آ سکے۔