پاکستان میں سونے کی قیمتوں میں تاریخی اضافہ

کراچی : پاکستان میں سونے کی قیمتوں میں ایک بار پھر تاریخی اضافہ دیکھنے میں آیا ہے۔ عالمی مارکیٹ میں سونے کی قیمت میں اضافے کے بعد پاکستان میں بھی سونے کی فی تولہ قیمت میں 3 ہزار 500 روپے کا اضافہ ہوا ہے جس کے بعد فی تولہ سونے کی قیمت 2 لاکھ 72 ہزار روپے تک پہنچ گئی ہے۔

اسی طرح 10 گرام سونے کی قیمت میں بھی 3 ہزار ایک روپے کا اضافہ ہوا اور یہ 2 لاکھ 33 ہزار 196 روپے کی سطح پر پہنچ گئی ہے۔ 

رپورٹ کے مطابق جمعہ کو عالمی مارکیٹ میں سونے کی قیمت 35 ڈالر فی اونس بڑھ کر 2 ہزار 612 ڈالر فی اونس ہو گئی جس کے بعد پاکستان میں سونے کی قیمتوں میں اضافے کا سلسلہ جاری رہا۔ 

آل پاکستان جیولرز مینوفیکچررز ایسوسی ایشن کے چیئرمین محمد ارشد کے مطابق غزہ میں بڑھتی ہوئی کشیدگی اور امریکی فیڈرل ریزرو کی شرح سود میں کمی سے سونے کے بین الاقوامی نرخوں پر اضافی دباؤ پڑ رہا ہے جس کی وجہ سے سونے کی قیمتیں مسلسل بڑھ رہی ہیں۔

یاد رہے کہ رواں سال کے آغاز میں فی تولہ سونے کی قیمت 2 لاکھ 19 ہزار 700 روپے اور 10 گرام سونے کی قیمت 1 لاکھ 88 ہزار 357 روپے تھی۔ اس طرح رواں سال کے دوران فی تولہ سونے کی قیمت میں 52 ہزار 300 روپے اور 10 گرام سونے کی قیمت میں 44 ہزار 939 روپے کا اضافہ ہوا ہے۔