9مئی مقدمات میں پی ٹی آئی قیادت گناہ گار قرار، رپورٹ عدالت میں پیش

مشترکہ تحقیقاتی ٹیم (جے آئی ٹی) نے 9 مئی کے مختلف مقدمات میں پاکستان تحریک انصاف (پی ٹی آئی) کی قیادت کو مجرم قرار دے دیا۔

لاہور کی انسداد دہشت گردی  عدالت کے جج ارشد جاوید نے 9 مئی کے مختلف مقدمات کی سماعت کی اور جے آئی ٹی نے سانحہ 9 مئی کے  حوالے سے مختلف مقدمات کی تحقیقات مکمل کرکے رپورٹ عدالت میں جمع کرائی۔

رپورٹ میں کہا گیا کہ پی ٹی آئی قیادت نے 9 مئی کو عوام کو اکسایا، اسد عمر، اعظم سواتی اور حافظ فرحت عباس سمیت دیگر ملزمان قصور وار ہیں۔

دوران سماعت فاضل جج نے ملزمان کے وکلا سے مکالمہ کرتے ہوئے کہا کہ پہلے آپ تفتیش مکمل کرنے کا کہہ رہے تھے، اب بات ختم ہو گئی، اس لیے بحث کرتے ہیں، آپ تاریخ بتا دیں۔

بعد ازاں عدالت نے ملزمان کے وکلا کو 9 مئی کو مختلف مقدمات میں دلائل کے لیے آئندہ سماعت پر 14 جنوری کو طلب کر لیا۔