گھریلو صارفین کو گیس کی بلاتعطل فراہمی کو فوری طور پر یقینی بنایا جائے، وزیر اعظم

وزیراعظم محمد شہبازشریف نے ہدایت کی ہے کہ موسم سرما میں گھریلو صارفین کو گیس کی بلاتعطل فراہمی کو فوری طور پر یقینی بنایا جائے۔

وزیراعظم نے گھریلو صارفین کو گیس سپلائی میں کمی کی شکایت کانوٹس لیتے ہوئے گیس سپلائی نظام میں اصلاحات لانے کی ہدایت کی تاکہ اس مسئلے کو مستقل طور پر حل کیا جاسکے۔

شہبازشریف نے کہا کہ گھریلو صارفین کو گیس کی فراہمی حکومت کی اولین ترجیح ہے۔

وزیراعظم کو بریفنگ دی گئی کہ سسٹم میں سرپلس آر ایل این جی موجود ہے' جس کی وجہ سے گیس لوڈمنیجمنٹ میں پچھلے سال کی نسبت بہتری آئی ہے۔

اجلاس کو کہا گیا کہ پھلے سال کی نسبت اس سال گیس لوڈشیڈنگ کا دورانیہ کم ہے اور گھریلو صارفین کو صبح 5بجے سے رات 10بجے تک گیس فراہم کی جارہی ہے۔

اجلاس کو کہا گیا کہ پاور سیکٹر کو بھی گیس ڈیمانڈ کے مطابق دی جارہی ہے اور صارفین کی شکایات کے حوالے سے ایس این جی پی ایل اور ایس ایس جی سی کے آن لائن ڈیش بورڈز کام کررہے ہیں۔