اسلام آباد میں سرکاری ملازمین کا احتجاج ، سیکرٹریٹ چوک میدان جنگ بن گیا

تفصیلات کے مطابق تنخواہوں میں اضافے کےمطالبے پرسرکاری ملازمین کا احتجاج جاری  ہے ،  پاک سیکرٹریٹ میدان جنگ کی صورت اختیار کرگیا  ہے ، پولیس کی جانب  سے سرکاری ملازمین پر آنسو گیس کی شیلنگ ،مظاہرین کی جانب سے پتھراؤ کیا گیا ۔  پولیس نے مرکزی گیٹ بند کردیا تاہم ملازمین  سیکرٹیر یٹ سے باہر آگئے اور  پارلیمنٹ ہاؤس جانے کا اعلان کیا ہے  ۔پولیس نے  احتجاج کرنے والے 20 سے زائد  سرکاری ملازمین کو گرفتار کرلیا ۔ جبکہ  دھرنا ناکام بنانے کیلئےمزید گرفتاریوں کا سلسلہ  جاری ہے ۔   وزارت خزانہ، وزارت داخلہ، وزارت توانائی، صنعت وپیداوار سمیت اہم وزارتیں بند ہیں،سرکاری ملازمین نے وزارتوں کے دروازے بند کر دیے ہیں جس کے باعث سائلین کی وزارتوں اور ڈویژنز تک رسائی نہیں ہے۔

  احتجاج کے باعث وفاقی دارالحکومت میں   ٹریفک کا نظام درہم برہم ہوگیا ۔  ٹریفک پولیس کی جانب سے  اضافی نفری  تعینات کردی گئی  ہے اور  جناح ایونیو پر ایکسپریس چوک سے ڈی چوک تک سڑک کے دونوں اطراف  ٹریفک کو متبادل راستے کی جانب موڑ دیا گیا۔ 

دوسری جانب  مظاہرین کاکہنا ہے کہ ہم پر امن ہیں پھر بھی گرفتاریاں کی جارہی ہیں ، انہوں نے مطالبہ کیا  کہ  جب تک ہمارے مرکزی لیڈر رحمن باجوہ کو نہیں چھوڑا جائے گا کسی قسم کے مذاکرات نہیں ہوں گے ۔ اس سے قبل پولیس نے رات گئے سرکاری ملازمین کے رہنماؤں کے گھروں پر چھاپے مار کر متعدد مزدور رہنماؤں کو حراست میں لیکر تھانے منتقل کر دیا۔

مزید تفصیلات شامل کی جارہی ہیں  ۔۔۔