مغربی کنارے پراسرائیلی خودمختاری نافذ کرنے کی کوشش عالمی قوانین کی کھلی خلاف ورزی ہے،دفتر خارجہ

اسلام آباد: پاکستان نے مقبوضہ مغربی کنارے پراسرائیلی خودمختاری نافذ کرنے کی کوشش کی شدید الفاظ میں مذمت کرتے ہوئے اسےعالمی قوانین کی کھلی خلاف ورزی قرار دیا۔

ترجمان دفترخارجہ شفقت علی خان کی جانب سے جاری کر دہ بیان میں کہا گیا ہے کہ مغربی کنارے پر اسرائیلی خود مختاری نافذ کرنے کا اقدام عالمی قوانین کی صریح خلاف ورزی ہے اوراسرائیل کی غیر قانونی قبضے کو مستحکم کرنے کی کوشش ہے۔

دفترخارجہ نے بیان میں کہا ہے کہ یہ یکطرفہ اقدامات نہ صرف اشتعال انگیز ہیں بلکہ خطے میں امن اوراستحکام کو سنگین نقصان پہنچا سکتے ہیں۔

پاکستان نے عالمی برادری پرزوردیا ہے کہ وہ فوری طورپرکارروائی کرے اوراسرائیل کوان اقدامات پرجوابدہ ٹھہرائے۔

اپنے بیان میں ترجمان نےدفتر خارجہ نے مزید کہا کہ ایسے اقدامات اقوامِ متحدہ کی قراردادوں کے تحت مقبوضہ فلسطینی علاقوں کی قانونی حیثیت کو تبدیل نہیں کرسکتے، پاکستان نے فلسطینی عوام کے حقِ خودارادیت کی غیرمتزلزل حمایت کا اعادہ کیا ہے۔