گوادر کے قریب ماہی گیروں کی کشتی حادثے کا شکار، ایک جاں بحق، چار لاپتہ

بلوچستان کے ساحلی علاقے گوادر کے قریب کراچی سے تعلق رکھنے والے ماہی گیروں کی کشتی سمندر میں ڈوب گئی، جس کے نتیجے میں ایک ماہی گیر جاں بحق، چار لاپتہ جبکہ ایک معجزانہ طور پر محفوظ رہا۔

تفصیلات کے مطابق، حادثے کا شکار کشتی میں کراچی کے مختلف علاقوں—ابراہیم حیدری، علی اکبر شاہ گوٹھ اور مچھر کالونی—سے تعلق رکھنے والے 6 ماہی گیر سوار تھے۔

ڈوبنے والی کشتی میں باپ بیٹا بھی شامل تھے۔ باپ ایوب کی لاش نکال لی گئی ہے جبکہ بیٹا ذیشان سمیت چار ماہی گیر تاحال لاپتہ ہیں۔ واقعے میں صرف ایک ماہی گیر خوش قسمتی سے زندہ بچ سکا۔

پاکستان فشر فوک فورم کے میڈیا کوآرڈینیٹر کمال شاہ نے واقعے پر افسوس کا اظہار کرتے ہوئے متعلقہ حکام سے اپیل کی ہے کہ فوری طور پر ریسکیو آپریشن تیز کیا جائے تاکہ لاپتہ ماہی گیروں کی تلاش ممکن ہو سکے۔