عمران خان نے بیٹوں کو پاکستان آنے سے روک دیا، احتجاجی سیاست سے لاتعلقی کا اعلان

 پاکستان تحریکِ انصاف (پی ٹی آئی) کے بانی عمران خان نے اپنے دونوں بیٹوں قاسم اور سلیمان کو پاکستان آنے سے روک دیا ہے۔

اڈیالہ جیل میں صحافیوں سے غیر رسمی گفتگو کرتے ہوئے عمران خان نے واضح کیا کہ قاسم اور سلیمان نہ تو پاکستان آئیں گے، اور نہ ہی کسی احتجاجی تحریک میں شریک ہوں گے یا قیادت کریں گے۔

واضح رہے کہ گزشتہ کچھ دنوں سے یہ قیاس آرائیاں گردش کر رہی تھیں کہ عمران خان کے بیٹے ان کی رہائی کے لیے شروع کی جانے والی کسی ممکنہ تحریک میں پاکستان آ کر شرکت کریں گے۔ متعدد پی ٹی آئی رہنماؤں کی جانب سے بھی اس حوالے سے بیانات سامنے آئے تھے۔

تاہم عمران خان کے تازہ مؤقف نے ان خبروں کی تردید کرتے ہوئے یہ واضح کر دیا ہے کہ ان کے بیٹے سیاسی سرگرمیوں میں حصہ نہیں لیں گے۔