صدر مملکت عارف علوی کا عید الاضحٰی کے موقع پر یتیم خانہ "دارالحساس" اسلام آباد کا دورہ

تفصیلات کے مطابق دورہ کے موقع پر صدر مملکت کے ہمراہ بیگم ثمینہ عارف علوی بھی تھیں ، صدر مملکت کا کہنا تھا کہ حضور صلی اللہ علیہ وآلہ وسلم بچوں سے بے پناہ شفقت فرماتے تھے،عید پر یتیم بچوں کا خاص خیال رکھتے تھے۔

انہوں نے کہا ہمیں بھی یتیم بچوں اور نادار افراد کا خصوصی خیال رکھنے کی ضرورت ہے، غریبوں اور معاشرے کے کمزور افراد کے احساس پر مبنی معاشرے کے قیام سے ہی ریاست مدینہ کے خواب کی تعبیر ممکن ہے ، بچے جتنی محنت کریں گے،ہم اتنا آگے بڑھیں گے اور ملک ترقی کرے گا ۔

صدر مملکت نےبچوں کو نصیحت کرتے ہوئے کہا کہ ایک دُوسرے کا خیال رکھیں، سچ بولیں، پاکستان کی ترقی کیلئے بچوں کی تعلیم اور صحت ازحد ضروری ہے۔

صدر مملکت کا مزید کہنا تھا کہ بچوں کی ذہنی و جسمانی نشوونما اور اُنہیں غذائی قلت سے بچانے کیلیئے تعلیم اور خوراک کی فراہمی ضروری ہے، دار الاحساس میں بچوں کو دی جانے والی توجہ قابل تحسین ہے ۔