ٹی ایل پی رہنما سعد رضوی کے گھر سے 14 کروڑ سے زائد کی رقم اور زیورات برآمد

وفاقی تحقیقاتی ادارے (ایف آئی اے) نے پرتشدد مظاہروں میں ملوث مذہبی جماعت کے خلاف مالیاتی تحقیقات اور کارروائی کا آغاز کر دیا ہے۔

ترجمان ایف آئی اے کے مطابق، جماعت کے عہدیداروں اور کارکنان کے بینک اکاؤنٹس اور اثاثہ جات کی چھان بین جاری ہے۔
ابتدائی تحقیقات میں کئی بینک اکاؤنٹس منجمد کر دیے گئے ہیں، جنہیں پرتشدد احتجاج کی مالی معاونت میں استعمال کیا جا رہا تھا۔

ایف آئی اے کا کہنا ہے کہ فنڈنگ میں ملوث افراد کے نام امیگریشن اسٹاپ لسٹ (ایگزٹ کنٹرول لسٹ یا اسٹاپ لسٹ) میں شامل کیے جا رہے ہیں تاکہ ان کی بیرونِ ملک روانگی روکی جا سکے۔

ٹی ایل پی سربراہ کے گھر سے کروڑوں مالیت کا سامان برآمد

ادھر پنجاب پولیس نے تحریک لبیک پاکستان (ٹی ایل پی) کے سربراہ سعد رضوی کے گھر پر حالیہ چھاپے کے دوران برآمد کیے گئے سامان کی تفصیلات جاری کر دی ہیں۔

پولیس کے مطابق، چھاپے کے دوران پاکستانی اور غیر ملکی کرنسی، طلائی زیورات، قیمتی گھڑیاں، پرائز بانڈز اور دیگر قیمتی اشیاء برآمد ہوئیں۔

ترجمان کے مطابق، گھر سے 14 کروڑ 44 لاکھ روپے کی پاکستانی کرنسی برآمد کی گئی، جبکہ بھارتی کرنسی میں 50 ہزار روپے بھی شامل تھے۔

حکام کا کہنا ہے کہ چھاپے اور مالیاتی تحقیقات کا مقصد پرتشدد سرگرمیوں کی فنڈنگ کے ذرائع کا سراغ لگانا اور قانون کے مطابق کارروائی کرنا ہے۔