خیبرپختونخوا: پی ٹی آئی کی کابینہ پر مشاورت، نئے اور پرانے چہروں کی واپسی متوقع

وزیراعلیٰ خیبرپختونخوا کی حلف برداری سے قبل پاکستان تحریک انصاف (پی ٹی آئی) کی اعلیٰ سطحی مشاورت وزیراعلیٰ ہاؤس پشاور میں جاری ہے، جس میں آئندہ صوبائی کابینہ کی تشکیل پر غور کیا جا رہا ہے۔

ذرائع کے مطابق، زیادہ تر پرانے وزرا، مشیران اور معاونین خصوصی کو دوبارہ کابینہ میں شامل کیے جانے کا امکان ہے، تاہم کچھ نئے اور فعال چہروں کو بھی اہم ذمہ داریاں سونپی جائیں گی۔

ذرائع کا کہنا ہے کہ پی ٹی آئی کے اندرونی حلقوں میں علی امین گنڈاپور مخالف گروپ سے تعلق رکھنے والے ارکان بھی وزارتوں کے حصول کے لیے متحرک ہو چکے ہیں۔
کئی اہم رہنما کابینہ میں جگہ پانے کے لیے وزیراعلیٰ ہاؤس کے چکر لگا رہے ہیں۔

سہیل آفریدی کو کابینہ میں ردوبدل کے اختیارات مل گئے

ذرائع نے انکشاف کیا ہے کہ پی ٹی آئی کے چیئرمین عمران خان نے نومنتخب وزیراعلیٰ سہیل آفریدی کو کابینہ میں رد و بدل کے مکمل اختیارات دے دیے ہیں، تاہم صرف مزمل اسلم کو بطور مشیر خزانہ نامزد کرنا عمران خان کی جانب سے براہ راست فیصلہ تھا۔

سابق وزرا کی واپسی اور سیاسی چالاکیاں

ذرائع کے مطابق، سابق وزیراعلیٰ علی امین گنڈاپور کی جانب سے شہرام ترکئی اور اسد قیصر کے بھائیوں کو سابقہ کابینہ سے فارغ کیے جانے کے بعد اب سہیل آفریدی کے منتخب ہوتے ہی شہرام ترکئی اور عاطف خان نے وزیراعلیٰ ہاؤس میں اپنی سیاسی سرگرمیاں دوبارہ تیز کر دی ہیں۔