لاہور سے مریدکے تک احتجاج: پولیس نے 253 افراد گرفتار کرلیے

قانون نافذ کرنے والے اداروں نے مذہبی جماعت کے حالیہ پرتشدد مظاہروں میں ملوث افراد کی گرفتاری کے لیے جدید ٹیکنالوجی کا سہارا لینا شروع کردیا ہے۔

پولیس حکام کے مطابق لاہور سے مریدکے تک جاری مظاہروں کے دوران پرتشدد کارروائیوں میں شامل افراد کی تلاش کے لیے جیوفینسنگ اور سی سی ٹی وی کیمروں کی فوٹیجز سے مدد لی جا رہی ہے۔

پولیس کا کہنا ہے کہ اب تک مختلف مقدمات میں 253 افراد کو حراست میں لیا جا چکا ہے، جب کہ مزید گرفتاریوں کے لیے موبائل ڈیٹا اور نگرانی کا عمل جاری ہے۔

ذرائع کے مطابق، توڑ پھوڑ اور جلاؤ گھیراؤ میں ملوث عناصر کی شناخت کے لیے موبائل فارنزک بھی جاری ہے، جب کہ زیرِ حراست افراد کے واٹس ایپ گروپس میں شامل افراد کا ڈیٹا بھی جانچ پڑتال کے عمل سے گزارا جا رہا ہے۔

پولیس کے مطابق درج کیے گئے مقدمات میں دہشت گردی، اقدامِ قتل، ڈکیتی اور پولیس پر حملے سمیت سنگین نوعیت کی دفعات شامل کی گئی ہیں۔