نومبر احتجاج کیس: علیمہ خان کے ناقابل ضمانت وارنٹ جاری

راولپنڈی میں انسداد دہشت گردی کی عدالت نے نومبر احتجاج کیس میں مسلسل عدم پیشی پر علیمہ خان کے ناقابلِ ضمانت وارنٹ گرفتاری جاری کر دیے۔

انسداد دہشت گردی کی خصوصی عدالت کے جج امجد علی شاہ نے کیس کی سماعت کی، جس میں علیمہ خان اور ان کے وکیل غیر حاضر رہے۔ عدالت کو بتایا گیا کہ ملزمہ کی طرف سے حاضری سے استثنیٰ کی کوئی درخواست بھی دائر نہیں کی گئی۔

سماعت کے دوران سرکاری وکیل ظہیر شاہ نے موقف اختیار کیا کہ علیمہ خان دانستہ طور پر پیشی سے گریز کر رہی ہیں اور عدالتی کارروائی میں رکاوٹ ڈال رہی ہیں۔ انہوں نے عدالت سے ناقابل ضمانت وارنٹ اور ضمانت منسوخ کرنے کا شوکاز نوٹس جاری کرنے کی درخواست کی۔

دلائل مکمل ہونے کے بعد عدالت نے علیمہ خان کے خلاف ناقابل ضمانت وارنٹ جاری کرتے ہوئے ضامن کو نوٹس بھجوا دیا، جس میں ہدایت کی گئی ہے کہ آئندہ سماعت پر ملزمہ کو ہر صورت پیش کیا جائے۔ کیس کی مزید سماعت 20 اکتوبر تک ملتوی کر دی گئی ہے۔