پیپلزپارٹی کا آزاد کشمیر میں نئی حکومت سازی کے لیے سیاسی رابطوں کا آغاز

پاکستان پیپلز پارٹی نے آزاد کشمیر کی قانون ساز اسمبلی میں موجود مختلف پارلیمانی گروپوں سے رابطے بڑھانے کا فیصلہ کیا ہے۔

بااعتماد ذرائع کے مطابق پیپلز پارٹی کے سینئر رہنما رواں ہفتے اسلام آباد کا دورہ کریں گے، جہاں وہ آزاد کشمیر کے مختلف سیاسی گروہوں کے ساتھ مجوزہ حکومت سازی کے فریم ورک پر مشاورت کریں گے۔ اس موقع پر پیپلز پارٹی آزاد کشمیر کی پارلیمانی پارٹی کا اجلاس بھی اسلام آباد میں منعقد کیا جائے گا۔

ذرائع کا کہنا ہے کہ پیپلز پارٹی کی سینٹرل ایگزیکٹو کمیٹی (CEC) پہلے ہی مجوزہ حکومت سازی کے منصوبے کی منظوری دے چکی ہے۔ وزارت عظمیٰ کے لیے امیدوار کا فیصلہ بھی اسٹیک ہولڈرز سے مشاورت کے بعد پارٹی کی اعلیٰ قیادت کرے گی۔

ادھر یہ اطلاعات بھی موصول ہوئی ہیں کہ پیپلز پارٹی کی قیادت، مسلم لیگ (ن) کے ساتھ آزاد کشمیر اسمبلی کی آئندہ مدت، عام انتخابات اور دیگر آئینی معاملات پر گفتگو کرے گی۔