متنازعہ ٹوئٹ کا معاملہ:ایڈوکیٹ ایمان مزاری کے شوہر ہادی علی چٹھہ گرفتار

اسلام آباد:ایڈووکیٹ ایمان مزاری کے شوہر ایڈووکیٹ ہادی علی چٹھہ کو گرفتار کر لیا گیا ہے۔

تفصیلات کے مطابق اسلام آباد کی مقامی عدالت میں ایڈووکیٹ ایمان مزاری اور ان کے شوہر ایڈووکیٹ ہادی علی چٹھہ کے خلاف متنازع ٹوئٹ کیس کی سماعت میں ہوئی، جہاں عدالت نے ہادی علی چٹھہ کے وارنٹ گرفتاری جاری کر دیے۔

دوران سماعت عدالت نے ہادی علی چٹھہ کو گرفتار کرکے کل پیش کرنے کا حکم دیا اور کیس کی مزید سماعت کل تک ملتوی کر دی۔

ذرائع کے مطابق سماعت مکمل ہونے کے بعد جیسے ہی ہادی علی چٹھہ عدالت سے باہر نکلے، نیشنل سائبر کرائم انویسٹی گیشن ایجنسی (NCCIA) کے اہلکاروں نے انہیں ہتھکڑی لگا کر گرفتار کرلیا۔

خیال رہے کہ  30 ستمبر کو ایڈیشنل ڈسٹرکٹ اینڈ سیشن جج محمد افضل مجوکہ کی عدالت میں ایمان مزاری اور ہادی چٹھہ کے خلاف فرد جرم عائد کی گئی تھی، دونوں ملزمان کورٹ میں موجود نہیں تھے۔

نیشنل سائبر کرائم انویسٹی گیشن ایجنسی (این سی سی آئی اے) نے ملزمان کے خلاف 7 صفحات پر مشتمل چالان جمع کرایا تھا، چالان میں پراسیکیوشن کے 4 گواہان کی فہرست بھی شامل تھی۔

چاروں گواہان این سی سی آئی اے کے ملازم ہیں، چالان میں ایمان مزاری کے مختلف ٹوئٹس کا متن بھی درج تھا۔