فیس بک میں نیا اے آئی فیچر، پوسٹس کے لیے خودکار تصاویر بنانے کی سہولت

دنیا کا مقبول ترین سوشل میڈیا پلیٹ فارم فیس بک اربوں صارفین کے ساتھ مقبولیت کے عروج پر ہے۔

میٹا کے اس پلیٹ فارم میں اتنے زیادہ فیچرز شامل ہیں کہ اکثر صارفین کو نئی اپ ڈیٹس کا علم بھی نہیں ہوتا، کیونکہ کمپنی کی جانب سے بعض اوقات ان کا باضابطہ اعلان نہیں کیا جاتا۔

ایسا ہی ایک نیا فیچر فیس بک میں خاموشی سے شامل کیا گیا ہے جو پوسٹس بنانے کے عمل کو مزید بہتر بنائے گا۔

میٹا کی جانب سے آرٹیفیشل انٹیلی جنس (اے آئی) کو اپنی ایپس کے مختلف حصوں میں ضم کیا جا رہا ہے، اور اب فیس بک میں ایک اہم تبدیلی متعارف کرائی گئی ہے۔

اب صارفین میٹا اے آئی کو اپنی مرضی کی تصاویر تیار کرنے کے لیے براہِ راست استعمال کرسکیں گے۔ اس سے قبل یہ سہولت صرف میٹا اے آئی سے چیٹ یا دیگر طریقوں سے دستیاب تھی۔

نئے فیچر کے تحت فیس بک کے “واٹس آن یور مائنڈ” پوسٹ باکس میں ایک نیا بٹن شامل کیا گیا ہے۔ یہ بٹن نیچے دائیں جانب ایموجی فیس کے برابر میں موجود ہوگا، جس پر کلک کرکے صارفین میٹا اے آئی سے اپنی مرضی کی تصاویر تیار کروا سکتے ہیں۔

تحریری ہدایات دینے کے بعد اے آئی چار مختلف تصاویر کے آپشن فراہم کرے گا، جن میں سے کسی ایک کو منتخب کیا جا سکتا ہے۔ بائیں جانب تصویر میں ترمیم کے لیے بھی مختلف آپشنز موجود ہوں گے۔

جب صارف تصویر سے مطمئن ہو جائے تو "ڈن" پر کلک کرکے اسے براہِ راست پوسٹ کیا جا سکتا ہے۔

یہ فیچر فی الحال بتدریج متعارف کرایا جا رہا ہے، اس لیے ابھی تمام صارفین کے لیے دستیاب نہیں، تاہم توقع ہے کہ آئندہ چند روز یا ہفتوں میں یہ سب کے لیے دستیاب ہو جائے گا۔