شہریوں کیلئے اچھی خبر،کراچی سمیت ملک بھر کیلئے بجلی سستی ہونے کا امکان

اسلام آباد:مہنگائی سے ستائے شہریوں کیلئے اچھی خبر سامنے آئی ہے، کراچی سمیت ملک بھر میں بجلی سستی ہونے کا امکان ہے۔

تفصیلات کےمطابق اس حوالے سے نیپرا نے ماہانہ فیول ایڈجسٹمنٹ کے تحت بجلی سستی کرنے کی درخواست پر سماعت مکمل کر لی، سینٹرل پاور پرچیزنگ ایجنسی (سی پی پی اے) نے ستمبر کی ایڈجسٹمنٹ میں 37 پیسے فی یونٹ کمی کی سفارش کر دی، جبکہ سی پی پی اے حکام نے موقف اختیار کیا کہ صنعتوں کو پیکجز دینے کا مقصد بجلی کی کھپت بڑھانا ہے۔

رپورٹ کے مطابق سولرائزیشن کی وجہ سے ستمبر میں دن کے وقت بجلی کی کھپت 15 ہزار میگاواٹ اور رات کے وقت 21 ہزار میگاواٹ ریکارڈ کی گئی، سولر انرجی کے استعمال کی وجہ سے دن میں بجلی کی کھپت 6 ہزار میگاواٹ کم رہی۔

نیشنل پاور کنٹرول سینٹر کے مطابق ستمبر میں پن بجلی کی پیداوار 8 ہزار میگاواٹ کے تخمینہ کے مقابلے میں صرف 4 ہزار میگاواٹ رہی جب کہ رواں ماہ فرنس آئل پلانٹس کی پیداوار گزشتہ ماہ کے مقابلے میں 6 فیصد زیادہ رہی۔ سی پی پی اے نے وضاحت کی کہ یہ پلانٹس صرف اوقات کار میں چلائے جاتے تھے۔

نیپرا نے سماعت کے بعد فیصلہ محفوظ کر لیا ہے جو بعد میں جاری کیا جائے گا۔

سی پی پی اے کی جانب سے جمع کرائی گئی درخواست میں سفارش کی گئی ہے کہ بجلی کے نرخوں میں کمی کا اطلاق کے الیکٹرک کے صارفین پر بھی کیا جائے جس سے کراچی سمیت ملک بھر میں بجلی سستی ہونے کا امکان ہے۔