فلسطینی جشن منا رہے تھے، یہاں ایک شرپسند جماعت اسلام آباد پر چڑھائی کی کوشش کر رہی تھی،مریم نواز

لاہور: وزیر اعلیٰ پنجاب مریم نواز شریف  نے کہا ہے کہ غزہ امن معاہدہ ہونے کے بعد فلسطینی جشن منا رہے تھے جبکہ یہاں ایک شرپسند جماعت اسلام آباد پر چڑھائی کی کوشش کر رہی تھی۔

تفصیلات کے مطابق وزیر اعلیٰ پنجاب مریم نواز نے اتحاد بین المسلمین کمیٹی سے خطاب کرتے ہوئے کہا کہ معاشرے کی بہتری کے لیے علمائے کرام کا اہم کردار ہے۔ ریاست اور عوام آپ کو اپنا رہنما مانتی ہے۔

انہوں نے کہا کہ سیاست کرنا سب کا حق ہے مگر ملک کی ترقی سب سے اہم ہے۔ اور ماضی میں سیاسی مقاصد کے لیے کچھ جماعتوں کو بنایا گیا۔ ایک جماعت کے خلاف کارروائی کی ضرورت کیوں پیش آئی؟ جبکہ پولیس اہلکاروں پر تشدد اور املاک کو نقصان نہیں پہنچانا چاہیے۔

تقریب سے خطاب کرتے ہوئے مریم نواز نے کہا کہ پوری کوشش ہوتی ہے روزمرہ کی زندگی میں کوئی خلل پیدا نہ ہو۔ سیاست کرنا مذہبی جماعتوں کا بھی حق ہے۔ جبکہ یہ نہیں ہوسکتا کہ آپ ہتھیار اٹھالیں اور کہیں جو بھی پولیس والا نظر آئے اس کو مار دیں۔ پولیس اور دیگر قانون نافذ کرنے والےادارے عوام کی جان ومال کے تحفظ کے لیے ہوتے ہیں۔

وزیر اعلیٰ پنجاب کہنا تھا کہ عوام کے جان ومال کا تحفظ حکومت کی اولین ترجیح ہے۔ اور حکومت چاہتی ہے کہ عوام گھر سے نکلیں تو ان کو کوئی مشکلات پیدا نہ ہوں۔

انہون نے مزید کہا کہ سیاست میں راستے بند کرنا اور املاک کو نقصان پہنچانا قبول نہیں، ان کا کہنا تھا کہ تحریک انصاف والے جب تک سیاسی جنگ لڑتے رہے ان کو کسی نے کچھ نہیں کہا۔ لیکن جب انہوں نے ریاست کے خلاف اسلحہ اٹھایا اس دن سے ان کے خلاف کارروائی شروع ہوئی۔

پاکستان تحریک انصاف کے حوالے سے گفتگو کرتے ہوئے ان کا کہنا تھا کہ پی ٹی آئی کا زوال 9 مئی والے دن سے شروع ہوا۔ یہاں سیاسی جنگ لڑنے والوں کو اسلحہ اٹھانے کی کیا ضرورت تھی؟ ہم نے بھی جدوجہد کی مگر کبھی ہتھیار نہیں اٹھائے۔ جبکہ جماعت اسلامی اور دیگر مذہبی جماعتوں نے جلسے کیے مگر کوئی ہتھیار نہیں اٹھایا۔