ہم ایران کے قریب فورس تعینات کررہے ہیں دیکھتے ہیں کہ آگے کیا ہوتا ہے،ٹرمپ

واشنگٹن ڈی سی: امریکی صدر ڈونلڈ ٹرمپ نے کہا کہ ہماری بڑی فورس ایران کی جانب رواں دواں ہیں۔ بہت سے جہاز ایران کی طرف جا رہے ہیں۔ ہم ایران کے قریب فورس تعینات کررہے ہیں۔ دیکھتے ہیں کہ آگے کیا ہوتا ہے۔

تفصیلات کے مطابق ایئر فورس ون میں میڈیا نمائندگان سے گفتگو کرتے ہوئے امریکی صدر ٹرمپ نے کہا کہ ایک بڑی بحری اور فضائی فوجی طاقت ایران کی جانب روانہ کر دی گئی ہے،فوجی نقل و حرکت کا مطلب یہ نہیں کہ امریکہ لازمی طور پر فوجی کارروائی کرے گا۔

انہوں نے کہا کہ ایران پر گہری نظر رکھی ہوئی ہے، ہم ایران کے قریب احتیاطی طور پر فورس تعینات کر رہے ہیں، دیکھتے ہیں کہ آگے کیا ہوتا ہے، ایران کو کہا تھا کہ اگر پھانسیاں دیں تو کارروائی کریں گے، میری دھمکی کے بعد ایران نے پھانسیاں منسوخ کر دیں۔

میڈیا نمائندگان سے گفتگومیں امریکی صدر نے ایران سے متعلق مزید کہا کہ اگر ایران بات چیت کرنا چاہتا ہے تو ہم بھی تیار ہیں۔لیکن اگر ایران نے نیوکلیئر ہتھیار بنائے تو دوبارہ حملہ کریں گے،ایران پر ممکنہ حملہ جوہری پروگرام پرحملے سے بھی بڑا ہوگا، شاید ہمیں یہ فوجی طاقت استعمال نہ کرنی پڑے۔

امریکی صدر کا مزید کہنا تھا کہ یوکرین جنگ کے خاتمے کیلئے کوشاں ہیں، گرین لینڈ کی سیکیورٹی پر نیٹو کے ساتھ مل کر کام کریں گے، اپریل میں چین جاؤں گا اور سال کے اختتام پر چینی صدر امریکا آئیں گے۔