Advertisement
پاکستان

وفاقی وزیر داخلہ کا ژاو شیرین کی چینی قونصل جنرل کی حیثیت سے خدمات کو خراج تحسین

ملاقات کے اختتام پر محسن نقوی نے چینی قونصل جنرل کو کھلاڑیوں کے دستخط شدہ بیٹ کا تحفہ دیا، جبکہ چینی قونصل جنرل نے محسن نقوی کو صدر شی جن پنگ کی کتاب بطور تحفہ پیش کی

GNN Web Desk
شائع شدہ 10 ماہ قبل پر جنوری 25 2026، 2:42 شام
ویب ڈیسک کے ذریعے
وفاقی وزیر داخلہ کا ژاو شیرین کی چینی قونصل جنرل کی حیثیت سے خدمات کو خراج تحسین

لاہور: وفاقی وزیر داخلہ اور چیئرمین پی سی بی محسن نقوی سے چین کے قونصل جنرل ژاو شیرین نے ملاقات کی، اس موقع پر محسن نقوی نے ژاو شیرین کی بطور چینی قونصل جنرل خدمات کو خراجِ تحسین پیش کیا اور ان کے لیے نیک خواہشات کا اظہار کیا۔

چینی قونصل جنرل ژاو شیرین نے محسن نقوی کی کارکردگی کو سراہتے ہوئے کہا کہ سب آپ کی حیرت انگیز رفتار کے معترف ہیں اور پاک چین دوطرفہ تعلقات کے حوالے سے آپ نے گراں قدر کردار ادا کیا ہے۔

انہوں نے کہا کہ پہلے بطور وزیر اعلیٰ پنجاب اور اب بطور وزیر داخلہ محسن نقوی نے پاک چین دوستی کو مضبوط بنانے کے لیے غیر معمولی کام کیا ہے، جبکہ پاکستان میں ان کا قیام انتہائی خوشگوار رہا۔

اس موقع پر وفاقی وزیر داخلہ محسن نقوی نے کہا کہ ژاو شیرین سے بھائیوں جیسا تعلق ہے اور آئندہ بھی رہے گا، لاہور میں آپ کی کمی کو ہمیشہ محسوس کیا جائے گا۔

انہوں نے بتایا کہ حالیہ دورہ چین کے دوران چینی وزیر پبلک سیکیورٹی وانگ ژاو ہونگ سے ساڑھے تین گھنٹے کی طویل ملاقات انتہائی خوشگوار اور سود مند رہی اور مشترکہ مفادات کے شعبوں میں باہمی تعلقات آگے بڑھ رہے ہیں۔ محسن نقوی نے کہا کہ وہ ستمبر میں دوبارہ چین کا دورہ کریں گے اور اپنے بھائی سے ملاقات کریں گے۔

News Image

ملاقات کے اختتام پر محسن نقوی نے چینی قونصل جنرل ژاو شیرین کو کھلاڑیوں کے دستخط شدہ بیٹ کا تحفہ دیا، جبکہ چینی قونصل جنرل نے محسن نقوی کو چینی صدر شی جن پنگ کی کتاب بطور تحفہ پیش کی۔

Advertisement
رجحانات
Advertisement