پاکستان اور گھانا کا معاشی، دفاعی،سیاحتی،ثقافتی ،تعلیم سمیت دیگر شعبوں میں تعاون کے فروغ پر اتفاق

اکرا :پاکستان اور گھانا کے مابین سیاسی مشاورت کا پہلا دور گھانا میں منعقد ہوا جس میں دوطرفہ تعاون اور دیگر شعبوں میں باہمی تعلقات کے حوالے سے تبادلہ خیال کیا گیا ۔

ترجمان دفتر خارجہ کے مطابق مشاورتی اجلاس میں سیاسی، معاشی، دفاعی، سیاحتی، ثقافتی، صحت، تعلیم اور انفارمیشن ٹیکنالوجی سمیت مختلف شعبوں میں تعاون کے فروغ پر اتفاق کیا گیا۔

اس کے علاوہ دوطرفہ سیاسی مشاورت اور فارن سروس اکیڈمی اسلام آباد اور گھانا فارن سروس انسٹیٹیوٹ کے درمیان تعاون پر مفاہمتی یاداشتوں پر دستخط کیے گئے۔

ترجمان دفتر خارجہ نے مزید بتایا کہ فریقین نے اس عزم کا بھی اعادہ کیا کہ ادارہ جاتی مکالمے کے اس عمل کے ذریعے دوطرفہ تعلقات کو مزید بامعنی اور منصوبہ جاتی بنیادوں پر آگے بڑھایا جائے گا۔

اجلاس میں یہ فیصلہ کیا گیا کہ دوطرفہ سیاسی مشاورتی اجلاس کا اگلا دور آئندہ سال اسلام آباد میں منعقد ہوگا۔