بلوچستان کے ضلع خضدار اور بارکھان میں تعمیراتی منصوبوں پر کام کرنے والے 14 مزدور اغوا

ویب ڈیسک: صوبہ بلوچستان کے ضلع خضدار اور بارکھان میں تعمیراتی منصوبوں پر کام کرنے والے 14 مزدور وں کو نامعلوم مسلح افراد نے اغوا کر لیا۔

تفصیلات کے مطابق پہلا واقعہ ضلع بارکھان کے علاقے عیشانی کے قریب ڈھولا ندی میں پیش آیا، جہاں مسلح افراد کرش پلانٹ پر کام کرنے والے تین مزدوروں کو زبردستی اپنے ساتھ لے گئے۔

اس حوالے سے پولیس ذرائع کا کہنا ہے کہ اغوا ہونے والے مزدوروں کا تعلق ضلع موسیٰ خیل سے تھا، اطلاعات یہ بھی ہیں کہ اسی علاقے میں مسلح افراد نے ایک پولیس چیک پوسٹ پر حملہ کر کے تین اہلکاروں سے اسلحہ بھی چھین لیا، تاہم اس کی سرکاری طور پر تصدیق نہیں کی گئی۔ 

پولیس کے مطابق دوسرا واقع ضلع خضدار میں پیش آیا جہاں خضدار سے تقریباً 50 کلومیٹر دور مولہ کے علاقے میں زیرِ تعمیر واٹر چینل منصوبے پر کام کرنے والی ایک نجی تعمیراتی کمپنی کے کیمپ پر موٹر سائیکلوں پر سوار مسلح افراد نے حملہ کیا اور کیمپ میں موجود گاڑی میں نو مزدوروں کو زبردستی بٹھایا اور انہیں نامعلوم مقام کی جانب لے گئے

خضدار پولیس کے اہلکار یوسف بلوچ کے مطابق واقعے کے محرکات تاحال معلوم نہیں ہوسکے، تاہم تحقیقات شروع کر دی گئی ہیں۔ 
ایک سینئر پولیس افسر نے بتایا کہ اغوا ہونے والے مزدوروں میں چھ کا تعلق سندھ سے ہے اور وہ ورلڈ بینک کے ایک منصوبے کے تحت نالیوں کو پختہ کرنے کے کام میں مصروف تھے۔ 

پولیس کے مطابق اغوا ہونے والوں میں پراجیکٹ منیجر گل شیر بھی شامل ہے، 2 مزدوروں کا تعلق سندھ جب کہ باقی سات کا تعلق بلوچستان کے مختلف علاقوں سے ہے۔

پولیس ذرائع کے مطابق اغوا کے بعد مسلح افراد مولہ ٹاؤن بھی گئے اور وہاں کے پولیس تھانے سے اسلحہ لے جانے کی کوشش کی، لیکن کامیاب نہ ہوسکے، کچھ دیر علاقے میں رہنے کے بعد وہ واپس چلے گئے۔