وزیراعظم سے قطری نائب وزیراعظم اور وزیر فاع کی ملاقات،اسٹریٹجک شراکت داری مضبوط بنانے کا عزم

دوحہ: وزیراعظم محمد شہبازشریف اور قطر کے نائب وزیراعظم اور وزیر مملکت دفاعی امور شیخ سعود بن عبدالرحمن بن حسن بن علی الثانی کی ملاقات میں دفاع اور سکیورٹی کے شعبوں میں تعاون پر تبادلہ خیال کیاگیا۔

تفصیلات کے مطابق ملاقات میں پاکستان اور قطر کے درمیان مضبوط اور تاریخی تعلقات کا اعادہ کرتے ہوئے تمام شعبوں میں اسٹریٹجک شراکت داری کو نئی جہت دینے کے مشترکہ عزم کااظہار کیا گیا۔

دوران ملاقات وزیراعظم نے دونوں ممالک کی مسلح افواج کے درمیان جاری تعاون پر اطمینان کا اظہار کرتے ہوئے دفاعی تعاون کو وسعت دینے کی اہمیت پر زور دیا۔

ملاقات میں قطر کے وزیر مملکت دفاعی امور نے پاکستان کی مسلح افواج کی پیشہ ورانہ مہارت کو سراہا اور دونوں ملکوں کے درمیان دفاعی شراکت داری کو مزید مستحکم کرنے میں دلچسپی کااظہارکیا۔

وزیراعظم محمد شہبازشریف اور وزیر مملکت شیخ سعود بن عبدالرحمن بن حسن بن علی الثانی نےعلاقائی امور خاص طور پرایران اور افغانستان کی صورتحال پر بھی تبادلہ خیال کیا ۔

انہوں نے خطے میں امن و استحکام کو فروغ دینے کے لیے مذاکرات، کشیدگی میں کمی اور اجتماعی کوششوں کی اہمیت پر زور دیا۔