ہیری بروک کی شاندار اسنچری، انگلینڈنے پاکستان کو شکست دیکر سیمی فائنل کے لیے کوالیفائی کرلیا

کینڈی: ہیری بروک کی شاندار اسنچری کی بدولت انگلینڈ نے پاکستان کو 2 وکٹوں سے شکست دے کر آئی سی سی ٹی ٹوئنٹی ورلڈ کپ کے سیمی فائنل کے لیے کوالیفائی کر لیا۔

تفصیلات کے مطابق کینڈی کے پالی کیلےاسٹیڈیم میں کھیلے جانے والے میچ میں انگلینڈ نے پاکستان کی جانب سے دیا جانے والا 165 رنز کا ہدف دلچسپ مقابلے کے بعد 8 وکٹوں پر حاصل کر لیا۔

انگلینڈ کی جانب سے ہیری بروک نے عمدہ بلے بازی کا مظاہرہ کرتے ہوئے شاندار اسنچری اسکور کی ۔

اس کے علاوہ ول جیکس نے 28، سیم کیرن نے 16 رنز بنائے جبکہ دیگر کوئی کھلاڑی ڈبل فگر میں داخل نہ ہوسکا، فل سالٹ میچ کی پہلی گیند پر آؤٹ ہوئے۔

پاکستان کی جانب سے شاہین آفریدی نے 4، محمد نواز اور عثمان طارق نے 2، 2 وکٹیں حاصل کیں۔

اس سے قبل پاکستان نے ٹا س جیت پر پہلے بلےبازی کرنے کا فیصلہ کیا اور مقررہ 20 اوورز میں 9 وکٹوں پر 164رنز بنائے۔ صاحبزادہ فرحان 63 رنز بناکر نمایاں رہے۔

پاکستان کی جانب سے کھیل کا آغاز مایوس کن ثابت ہوا، اننگز کا آغاز صاحبزادہ فرحان اور صائم ایوب نے کیا تاہم یہ جوڑی زیادہ دیر تک ساتھ نہ نبھا سکی اور صائم ایوب 7 رنز بناکر کیچ آؤٹ ہوگئے دوسرے نمبر پر آنیوالے بلے باز کپتان سلمان علی آغا بھی مخص 5 رنز بناکر چلتے بنے۔

بابر اعظم اور صاحبزادہ فرحان نے ذمہ دارانہ بیٹنگ کا مظاہرہ کرتے ہوئے ٹیم کے مجموعی سکور کو آگے بڑھایا تاہم 73 کے مجموعی سکور پر بابر اعظم 25 رنز بناکر بولڈ ہوگئے۔

پاکستان کی چوتھی وکٹ 122 کے مجموعی سکور پر گری جب صاحبزادہ فرحان 45 گیندوں پر 63 رنز بناکر ایل بی ڈبلیو آؤٹ ہوگئے، پانچویں نمبر پر فخرزمان 25 رنز بناکر کیچ تھما بیٹھے۔

جبکہ پاکستان کی چھٹی وکٹ 146 کے مجموعی سکور پر گری جب عثمان خان 8 رنز بناکر کیچ آؤٹ ہوئے جبکہ اگلی ہی گیند پر نئے آنیوالے بلے باز محمد نواز بغیر کھاتے کھولے چلتے بنے، شاہین آفریدی 2 اور شاداب خان 23 رنز بناکر آؤٹ ہوئے۔