لاہور: بسنت کے دوران 17 اموات ہوئیں،محکمہ داخلہ نے رپورٹ جمع کرا دی

لاہور: بسنت کے دوران اموات کی رپورٹ لاہور ہائیکورٹ میں جمع کرا دی گئی۔

تفصیلات کے مطابق لاہور ہائیکورٹ کے جسٹس ملک اویس خالد نے جوڈیشل ایکٹوزم پینل کی درخواست پر سماعت کی، دوران سماعت عدالتی حکم پر ہوم ڈیپارٹمنٹ نے رپورٹ جمع کرائی۔

جاری کر دہ رپورٹ میں کہا گیا کہ لاہور میں بسنت کے دوران مجموعی طور پر 17 اموات ہوئیں، کرنٹ لگنے سے 3 افراد ہلاک ہوئے، درخت سے گر کر 2 افراد ہلاک ہوئے جبکہ 12 افراد چھتوں سے گر کر جان کی بازی ہار گئے۔

دوران سماعت درخواست گزار کے وکیل اظہر صدیق نے موقف اختیار کیا کہ بسنت کے دوران ڈور پھرنے سے زخمیوں کا ڈیٹا نہیں دیا گیا، درخواست میں بسنت کے دوران ہونے والی اموات اور زخمیوں کی تفصیلات فراہم کرنے کی استدعا کی گئی ہے۔

جبکہ عدالت نے کارروائی آئندہ ہفتے تک ملتوی کرتے ہوئے ہوم سیکرٹری پنجاب سے زخمی افراد کی تفصیلات طلب کر لیں۔