عاشورہ سے محبت کرنے والے ایرانی آپ کی کھوکھلی دھمکیوں سے نہیں ڈرتے،ٹرمپ کےبیان پر ایران کاردعمل

تہران: ایرانی قومی سلامتی کے مشیر علی لاریجانی کا امریکی صدر ڈونلڈ ٹرمپ کے بیان پر ردعمل سامنے آگیا۔

تفصیلات کے مطابق ایران کی سپریم سیکیورٹی کونسل کے سیکریٹری علی لاریجانی نے سماجی رابطے کی سائٹ ’ایکس‘ پر جاری بیان میں کہا کہ عاشورہ سے محبت کرنے والی ایرانی قوم کاغذی دھمکیوں سے نہیں ڈرتی۔

بیان میں قومی سلامتی کے مشیرعلی لاریجانی نے کہا کہ عاشورہ سے محبت کرنے والے ایرانی عوام آپ کی کھوکھلی دھمکیوں سے نہیں ڈرتے، یہاں تم سے بڑے ناکام ہو چکے ہیں، تم بھی تباہ ہو سکتے ہو۔

انہوں نے کہا کہ ماضی میں بھی ایران سے زیادہ طاقتور قوتیں ایرانی قوم کو ختم نہیں کر سکیں،انہوں نے امریکا کو خبردار کرتے ہوئے کہا کہ ایسے بیانات دینے سے پہلے خود اپنے انجام کے بارے میں سوچنا چاہیے۔

رپورٹس کے مطابق ایرانی قومی سلامتی کے مشیر نے کہا کہ لہٰذا خبردار رہو کہ کہیں تم نابود نہ ہو جاؤ، آبنائے ہرمز یا تو سب کیلئے کھلا راستہ ہے، یا جنگ پسندوں کیلئے تنگ گزرگاہ ۔

خیال رہے کہ اس سے قبل امریکی صدر ڈونلڈ ٹرمپ نے کہا ہے کہ ایران جنگ جلد ختم ہو سکتی ہے لیکن اس ہفتے نہیں۔ آئل مارکیٹ میں قیمتیں بڑھنے کا عمل ایران پر زیادہ سخت حملوں کو متحرک کرے گا۔

بیان میں ٹرمپ نے کہا اگر ایران نے کوئی ایسا کام کیا جس سے آبنائے ہرمز میں تیل کا بہاؤ روکا جائے تو وہ اس سے 20 گنا زیادہ مار کھائے گا جتنا کہ اب تک مارا گیا ہے۔