امن کا وقت نہیں اپنے دشمنوں کو عبرتناک شکست دیں گے، سپریم لیڈر نے امریکا سے مذاکرات کی تجویز مسترد کر دی

تہران:ایران کے نئے سپریم لیڈر آیت اللہ مجتبیٰ خامنہ ای نے امریکا کے ساتھ جاری کشیدگی کوکم کرنے اور جنگ بندی کے حوالے سے تمام تجاویز کو مسترد کرتے ہوئے کہا ہے کہ یہ امن کا وقت نہیں ہے،ایران اپنے دشمنوں کو عبرتناک شکست دے گا ان سے کسی بھی قسم کے مذاکرات نہیں کیے جائے گے۔

تفصیلات کے مطابق برطانوی خبر رساں ادارے رائٹرز کا کہنا ہے ایک سینئر ایرانی عہدیدار نے منگل کے روز بتایا کہ دو ثالث ممالک کی جانب سے تہران کو امریکا کے ساتھ کشیدگی کم کرنے اور جنگ بندی کی تجاویز پہنچائی گئیں تاہم ایرانی سپریم لیڈر آیت اللہ مجتبیٰ خامنہ ای نے ان تجاویز کو مسترد کردیا ہے۔

رائٹرز کے مطابق عہدیدارنے مزید کہا کہ نئے ایرانی سپریم لیڈر نے اپنی پہلی خارجہ پالیسی سے متعلق میٹنگ میں امریکا اور اسرائیل کے خلاف سخت مؤقف اختیار کیا۔

انہوں نے بتایا کہ آیت اللہ مجتبیٰ خامنہ ای کا مؤقف امریکا اور اسرائیل کے خلاف انتقامی کارروائی کے حوالے سے ”انتہائی سخت اور سنجیدہ“ ہے تاہم یہ واضح نہیں کیا گیا کہ سپریم لیڈر نے اس اجلاس میں بذات خود شرکت کی یا نہیں۔

دوسری جانب آبی گزرگاہ آبنائے ہرمز بھی تاحال تک بند ہے، جس کے باعث عالمی توانائی کی قیمتوں میں اضافہ اور مہنگائی کے خدشات بڑھ گئے ہیں۔

جبکہ امریکی صدر ڈونلڈ ٹرمپ کی جانب سے اتحادی ممالک سے اس گزرگاہ کو کھلوانے میں مدد کی درخواست کو بھی خاطر خواہ پذیرائی نہیں مل سکی۔اورا ہم اتحادی ممالک جن میں جنوبی کوریا،جاپان،فرانس،برطانیہ، جرمنی ،آسٹریلیا اور یونان وغیر ہ نے اپنے جنگی جہاز بھیجنے سے انکار کر دیا ہے۔