وزیراعظم شہباز شریف کی پاکستان زرعی تحقیقاتی کونسل کو اعلیٰ تحقیقاتی ادارہ بنانے کی ہدایت

اسلام آباد:وزیراعظم محمد شہباز شریف نے پاکستان زرعی تحقیقاتی کونسل کو چین کی اکیڈمی آف ایگریکلچرل سائنسز کے طرز پر زرعی تحقیق کے حوالے سے اعلیٰ تحقیقاتی ادارہ بنانے کی ہدایت کی ہے۔انہوں نے کہا ہے کہ زرعی تحقیق کا ملک کے زراعت اور غذائی تحفظ کے شعبے کی فروغ میں کلیدی کردار ہے۔

تفصیلات کے مطابق وزیراعظم محمد شہباز شریف کی زیرِ صدارت وزرات قومی غذائی تحفظ و تحقیق اور پاکستان زرعی تحقیقاتی کونسل کے اُمور پر اجلاس منعقد ہوا۔

اجلاس میں نائب وزیراعظم و وزیر خارجہ محمد اسحاق ڈار، وفاقی وزراءاحد خان چیمہ، رانا تنویر حسین ، مصدق ملک ، وزیر اعظم کے مشیر رانا ثنااللہ، وزیر مملکت خزانہ بلال اظہر کیانی ، وزیراعظم کے معاونین خصوصی ہارون اختر اور طارق باجوہ، وزیر اعظم کے کوآرڈینیٹر برائے زراعت احمد عمیر اور متعلقہ اعلیٰ سرکاری افسران نے شرکت کی۔

اجلاس میں پاکستان زرعی تحقیقاتی کونسل (PARC) کی تنظیم نو کی اُصولی منظوری دی گئی۔وزیراعظم نے ہدایت کی کہ ٹائم لائن کے ساتھ PARC کی تنظیم نو جامع پلان تیار کیا جائے۔

دوران اجلاس پاکستان زرعی تحقیقاتی کونسل کو زرعی تحقیق کا جدید دور کی تقاضوں سے ہم آہنگ ایک فعال ادارہ بنانے کے حوالے سے تفصیلی بریفننگ دی گئی۔

علاوہ ازا ں اجلاس میں قومی غذائی ضروریات پوری کرنے اور زرعی شعبے کی برآمدات بڑھانے کے حوالے سےاسے ایک فعال ادارہ بنانے کیلئے گورننس ڈھانچے میں اصلاحات ، بہترین تحقیقی عملے کی خدمات، بین الاقوامی شراکت داری، صوبائی حکومتوں کے ساتھ بہتر روابط، اور کارکردگی کے واضح اہداف اصلاحاتی ایجنڈے کا حصہ ہیں۔

بریفنگ میں بتایا گیا کہ کونسل کے تحت کام کرنے والے تمام تحقیقی مراکز کو یکجا کرکے پانچ سنٹر آف ایکسیلنس بنائے جائیں گے ۔ یہ سنٹرز زیادہ پیداوار والے بیج، اعلیٰ نسل کے مویشی، پریسیشن ایگریکلچر، فارم میکانائزشن اور اس میں اے آئی کا استعمال، اور زرعی شعبے کی برآمدات بڑھانے کے لیے فوڈ پروسیسنگ کے شعبوں میں تحقیق کا کام کریں گے۔ زرعی تحقیق کو انڈسٹری کے ساتھ جوڑا جائیگا۔