پاکستان نے دہشتگردی کے خلاف کارروائی پر بھارت کے بے بنیاد بیان کو مسترد کر دیا

پاکستان نے افغانستان میں دہشت گردوں کے بنیادی ڈھانچے کے خلاف پاکستان کی جاری کارروائی سے متعلق بھارت کی وزارت خارجہ کی طرف سے جاری کردہ بے بنیاد، گمراہ کن اور غیر ضروری بیان کو مسترد کر دیا ہے۔

دفتر خارجہ کے ترجمان طاہر اندرابی نے یہ بات بھارت کی وزارت خارجہ کی طرف سے گزشتہ روز جاری کئے گئے ایک بیان سے متعلق آج میڈیا کے سوالات کا جواب دیتے ہوئے کہی۔

انہوں نے کہا کہ بھارت کی جانب سے افغان سرزمین سے پاکستان میں دہشت گردی کی فعال سرپرستی کے ساتھ ساتھ اس کے تاریخی کردار کو بگاڑنے کے تناظر میں یہ بیان محض بھارت کی صریحً منافقت اور دوغلے پن کی عکاسی کرتا ہے۔

دفترخارجہ نے کہا کہ بھارت اقوام متحدہ کی سلامتی کونسل کی پابندیوں کی فہرست میں شامل دہشت گردوں سمیت افغان سرزمین سے کارروائیاں کرنے والے دہشت گرد گروہوں کی حمایت اور سرپرستی سے باز رہے۔

اس سلسلے میں بھارت کو چاہئے کہ وہ پاکستان کی انسداد دہشت گردی کی کارروائیوں پر غیرضروری تنقید بند کرے۔