علماء سے خطاب: فیلڈ مارشل کا فرقہ واریت کے خاتمے کے لیے اتحاد اور برداشت پر زور

فیلڈ مارشل سید عاصم منیر نے راولپنڈی میں اہلِ تشیع مکتبِ فکر کے علماء سے ملاقات کی، جس میں قومی سلامتی اور معاشرتی ہم آہنگی میں علماء کے کردار پر تبادلۂ خیال کیا گیا۔

فیلڈ مارشل نے اتحاد، برداشت اور قومی یکجہتی کے فروغ میں علماء کے کلیدی کردار پر زور دیتے ہوئے کہا کہ خصوصاً غلط معلومات، فرقہ وارانہ بیانیے اور بیرونی سرپرستی میں ہونے والی تخریبی کوششوں کا مؤثر مقابلہ ضروری ہے۔

آپریشن "غضبُ للحق" کا حوالہ دیتے ہوئے انہوں نے واضح کیا کہ پاکستان اپنی سرزمین کے خلاف دہشت گردی کے لیے افغان سرزمین کے استعمال کو ہرگز برداشت نہیں کرے گا، اور اس عزم کا اعادہ کیا کہ جہاں کہیں بھی پاکستان کے خلاف سرگرم دہشت گرد اور ان کا نیٹ ورک موجود ہوگا، انہیں درست اور انٹیلی جنس بنیادوں پر کارروائیوں کے ذریعے ختم کیا جائے گا۔ انہوں نے افغان طالبان پر زور دیا کہ وہ اپنی سرزمین کو پاکستان کے خلاف دہشت گردی کے لیے استعمال ہونے سے روکیں۔

فیلڈ مارشل نے شرکاء کو خطے میں کشیدگی کم کرنے کے لیے پاکستان کی کوششوں اور فعال سفارت کاری سے آگاہ کیا۔ انہوں نے اس بات پر زور دیا کہ علماء اتحاد کو مضبوط بنانے اور انتہاپسندی کے خاتمے میں اہم کردار ادا کریں، اور یہ کہ مذہبی جذبات کو ملک میں تشدد بھڑکانے کے لیے استعمال نہیں ہونا چاہیے۔ کسی دوسرے ملک میں پیش آنے والے واقعات کی بنیاد پر پاکستان میں تشدد کو ہرگز برداشت نہیں کیا جائے گا۔

شرکاء علماء نے امن و استحکام کے لیے اپنی خواہش کا اظہار کرتے ہوئے مذہب کے نام پر ہونے والے تشدد کی سخت ترین الفاظ میں مذمت کی، اور ملک میں امن و استحکام کے قیام کے لیے قانون نافذ کرنے والے اداروں کی بھرپور حمایت کا یقین دلایا۔