ایران کا دوسرا امریکی ایف-35 لڑاکا طیارہ تباہ کرنے کا دعویٰ، پائلٹ کی تلاش جاری

تہران:ایران کے پاسداران انقلاب نے کہا ہے کہ اس کے فضائی دفاعی نظام نے خلیج میں ایک جنگی طیارے کو مار گرایا ہےجس کے پائلٹ کی تلاش کے لیے سرچ آپریشن جاری ہے۔

ایرانی میڈیا رپورٹس کے مطابق پاسداران انقلاب گارڈز کا کہنا ہے کہ وسطی ایران میں امریکی ایف 35 لڑاکا طیارے کو مار گرایا ہے، امریکی طیارہ ایف 35 کے پائلٹ کے بارے میں تاحال کوئی اطلاعات نہیں۔

رپورٹس کے مطابق طیارے میں زوداردھماکے کے سبب ممکنہ طورپرپائلٹ کے ایجیکٹ کرنے کا امکان نہیں ہے تاہم امریکی سینٹ کام نے ایرانی دعوے پر فی الحال کوئی ردعمل نہیں دیا۔

جبکہ امریکی میڈیا کے مطابق اعلیٰ حکام نے جہاز گرنے کی تصدیق کر دی ہے۔ امریکی افواج نے گمشدہ پائلٹ کی تلاش کے لیے سرچ آپریشن کیا، جب ایرانی فورسز بھی پائلٹ کی تلاش کے لیے متحرک ہو گئی ہیں۔

نیویارک ٹائمز نے امریکی حکام کے حوالے سے امریکی لڑاکا طیارے کے گرنے کی تصدیق کی ہے جب کہ جہاز کے عملے کے زندہ بچ جانے سے متعلق لاعلمی ظاہر کی ہے۔

ایرانی میڈیا رپورٹس میں مزید کہا گیا کہ ملکی بحریہ نے یہ بھی دعویٰ کیا ہے کہ قیشم جزیرے کے قریب ایک دشمن لڑاکا طیارہ مار گرایا گیا، جس کی ویڈیو بھی جاری کی گئی ہے، ویڈیو میں طیارے کو نشانہ بنتے ہوئے دیکھا جاسکتا ہے۔

ایرانی نیوی مزید دعویٰ کیا کہ امریکی طیارہ بردار بحری بیڑے “ابراہم لنکن” کو بھی کروز میزائلوں سے نشانہ بنایا گیا ہے اور اس حملے کی ویڈیو بھی جاری کردی گئی ہے۔

علاوہ ازاں ایرانی سرکاری میڈیا پرایک اعلان کیا گیا ہے جس میں کہا گہا ہے کہ جو بھی امریکی پائلٹ کو پکڑ کرلائے گا اور اتھارٹیز کے حوالے کریں گا اسے بھاری انعامی رقم سے نوازا جائے گا۔ 

دوسری جانب امریکی افواج نے پائلٹ کے زندہ ہونے کے امکان کے پیشِ نظر اس کی تلاش اور ایران کی سرحدوں سے باہر نکالنے کی کوشش کی ۔ اس آپریشن میں بلیک ہاک ہیلی کاپٹرز اور سی 130 طیارے کے ذریعے پائلٹ کی تلاش کی کوشش کی گئی جو بے نتیجہ رہی۔

واضح رہے کہ ااگر اس واقعے کی تصدیق ہوجاتی ہے تو یہ حالیہ جنگ میں ایرانی فوج کا شکار بننے والا دوسرا ایف 35 طیارہ ہوگا۔ اس سے قبل امریکی میڈیا نے ایک ایف 35 کے خلیجی ملک میں واقع امریکی اڈے پر ہنگامی لینڈنگ کی تصدیق کی تھی جب کہ ایک اور رپورٹ میں دعویٰ کیا گیا تھا کہ شدید نقصان کے باعث یہ طیارہ جلد آپریشنل نہیں ہو سکے گا۔

ایرانی مسلح افواج کے دعوے کے مطابق جنگ کے آغاز سے اب تک دو ایف 35، ایک ایف 18، دو ایف 16 اور چار ایف 15 طیارے مار گرائے جا چکے ہیں دوسری جانب امریکی فوج نے صرف تین ایف 15 اور ایک کے سی 135 ٹینکر طیارے کے نقصان کی تصدیق کی ہے۔