قائدِ عوا م کی برسی پر صدرِ مملکت اور وزیراعظم کا بھٹو شہید کی قومی و آئینی خدمات کو خراج ِ تحسین

اسلام آباد: قائد عوام اور ملک کے پہلے منتخب وزیر اعظم شہید ذوالفقار علی بھٹو کی برسی کے موقع پر صدرِ مملکت اور وزیراعظم کی جانب سے ان کی قومی، سیاسی اور آئینی خدمات کو خراجِ تحسین پیش کیا گیا ہے۔

تفصیلات کے صدر آصف علی زرداری نے شہید ذوالفقار علی بھٹو کی 47ویں برسی پر اپنے پیغام میں کہا کہ وہ پاکستان کی سیاسی تاریخ کی ایک نمایاں شخصیت تھے۔ انہوں نے کہا کہ ذوالفقار علی بھٹو نے قوم کو 1973 کا متفقہ آئین دیا، یہ آئین آج بھی ملک کی جمہوری بنیادوں کا ضامن ہے۔

اپنے بیان میں صدر آصف علی زرداری نے مزید کہا کہ شہید ذوالفقار علی بھٹو کی حکومت نے ایسی پالیسیوں اور اداروں کی بنیاد رکھی جنہوں نے آنے والے برسوں میں پاکستان کی اسٹریٹجک سمت اور قومی سوچ کو تشکیل دیا۔صدر نے شہید محترمہ بینظیر بھٹو کی جرات اور قربانی کو بھی خراجِ عقیدت پیش کیا۔

دوسری جانب وزیراعظم محمد شہباز شریف نے اپنے پیغام میں شہید ذوالفقار علی بھٹو کے یوم شہادت پر انہیں خراجِ عقیدت پیش کرتے ہوئے کہا کہ انہوں نے بطور وزیراعظم ملک کی ترقی، خوشحالی اور مضبوط دفاع کے لیے خلوص نیت سے گراں قدر خدمات انجام دیں۔

بیان میں وزیراعظم محمد شہباز شریف نے کہا کہ آئین پاکستان 1973 کی تیاری اور منظوری میں ذوالفقار علی بھٹو نے تعمیری کردار ادا کیا، جبکہ یہ آئین ملک میں پارلیمانی نظام کی مضبوطی اور جمہوریت کے فروغ میں کلیدی حیثیت رکھتا ہے۔

انہوں نے مزید کہا کہ ذوالفقار علی بھٹو نے جمہوریت میں عوامی طرز حکمرانی کے فروغ اور عوام کے بنیادی مسائل کے حل کے لیے قابل قدر کاوشیں کیں، جبکہ بطور وزیراعظم عالمی سطح پر بھی پاکستان کی مؤثر نمائندگی کی۔

وزیراعظم محمد شہباز شریف نے شہید ذوالفقار علی بھٹو کے درجات کی بلندی کے لیے دعا کرتے ہوئے کہا کہ ان کی سیاسی خدمات کو ہمیشہ یاد رکھا جائے گا۔