وزیر خارجہ اسحاق ڈار اور بحرینی ہم منصب سے ٹیلیفونک رابطہ، مشرق وسطیٰ اور خطے کی صورتحال پر گفتگو

اسلام آباد: نائب وزیر اعظم و وزیر خارجہ سینیٹر محمد اسحاق ڈار اور بحرین کے وزیر خارجہ ڈاکٹر عبداللطیف بن راشد الزیانی کے درمیان ٹیلیفونک رابطہ ہوا ہے۔

ترجمان دفتر خارجہ کے مطابق گفتگو کے دوران دونوں رہنماؤں نے خطے کی تازہ صورتحال پر تبادلہ خیال کیا۔

ترجمان کے مطابق ٹیلیفونک گفتگو میں نائب وزیر اعظم اسحاق ڈار نے کشیدگی میں فوری کمی کی ضرورت پر زور دیتے ہوئے مکالمے اور سفارتکاری کی اہمیت کو اجاگر کیا۔ انہوں نے مشرق وسطیٰ اور خلیجی خطے میں امن و استحکام کے فروغ کے لیے پاکستان اور چین کے پانچ نکاتی اقدام کا بھی ذکر کیا۔

ترجمان نے مزید بتایا کہ بحرینی وزیر خارجہ نے خطے میں امن و استحکام کے لیے پاکستان کی جانب سے مکالمے اور سفارتی کوششوں کو سراہا۔

ترجمان کے مطابق دونوں رہنماؤں نے کثیرالجہتی فورمز، بشمول اقوام متحدہ کی سلامتی کونسل میں جاری کوششوں پر بھی تبادلہ خیال کیا اور قریبی رابطے میں رہنے پر اتفاق کیا۔