پاکستان سمیت دنیا بھر کی مسیحی برادری آج ایسٹر کا تہوار مذہبی جوش و خروش سے منا رہی ہے

ویب ڈیسک:پاکستان سمیت دنیا بھر کی مسیحی برادری آج ایسٹر کا تہوار مذہبی جوش و خروش سے منا رہی ہے۔

تفصیلات کے مطابق ملک کے مختلف شہروں میں طلوع آفتاب سے قبل کینڈل لائٹ جلوس نکالے گئے جبکہ گرجا گھروں میں عبادات کا سلسلہ جاری ہے، جہاں ملک و قوم کے استحکام، امن اور بھائی چارے کیلئے خصوصی دعائیں کی جا رہی ہیں۔ 

اس موقع پر گرجا گھروں کے باہر سکیورٹی کے سخت انتظامات بھی کیے گئے ہیں۔

چیئرمین سینیٹ سید یوسف رضا گیلانی نے مسیحی برادری کو ایسٹر کی دلی مبارکباد دیتے ہوئے کہا کہ یہ تہوار محبت، امید اور روحانی تجدید کا پیغام دیتا ہے، اور مسیحی برادری ملک کے امن و خوشحالی کیلئے دعائیں کرے۔

وفاقی وزیر داخلہ محسن نقوی نے بھی مبارکباد دیتے ہوئے کہا کہ ایسٹر امید، محبت، قربانی اور نئے آغاز کی علامت ہے اور یہ دن رواداری، برداشت اور امن کا درس دیتا ہے۔

علاوہ ازاں وزیراعلیٰ پنجاب مریم نواز نے اپنے پیغام میں مذہبی ہم آہنگی، محبت اور اتحاد کے فروغ پر زور دیا جبکہ گورنر پنجاب سردار سلیم حیدر خان نے بھی مسیحی برادری کو ایسٹر کے موقع پر مبارکباد پیش کی۔