صدر مملکت اور وزیر اعظم کی پاکستان سمیت دنیا بھر کی مسیحی برادری کو ایسٹر کی مبارکباد

اسلام آباد: صدر آصف علی زرداری اور وزیراعظم محمد شہباز شریف نے پاکستان سمیت دنیا بھر کی مسیحی برادری کو ایسٹر کی مبارکباد پیش کرتے ہوئے اس تہوار کو امید، ہمدردی اور خیر کی شر پر فتح کی علامت قرار دیا ہے۔

تفصیلات کے مطابق صدرِ مملکت نے اپنے پیغام میں کہا کہ پاکستان میں مساوات، آزادی اور تحفظ جیسے اصول عملی طور پر موجود ہیں اور آئین ان اقدار کی عکاسی کرتا ہے۔ انہوں نے تعلیم، صحت اور دفاع سمیت مختلف شعبوں میں مسیحی برادری کے کردار کو سراہا اور اقلیتوں کے جان و مال اور وقار کے تحفظ کے عزم کا اعادہ کیا۔

اپنے بیان میں انہوں نے مزید کہا کہ برداشت، احترام اور ذمہ داری سے مضبوط معاشرہ تشکیل پاتا ہے، جبکہ قومی تاریخ میں مسیحی شخصیات کی خدمات کو بھی خراجِ تحسین پیش کیا۔

دوسری جانب وزیراعظم محمد شہباز شریف نے اپنے پیغام میں کہا کہ ایسٹر محبت، قربانی، درگزر اور بین المذاہب ہم آہنگی کا پیغام دیتا ہے۔

انہوں نے کہا کہ مسیحی برادری ملکی ترقی میں فعال کردار ادا کر رہی ہے اور حکومت تمام شہریوں خصوصاً اقلیتوں کے حقوق کے تحفظ کے لیے پرعزم ہے۔

جاری کر دہ بیان میں وزیر اعظم شہباز شریف نے مزید کہا کہ مذہبی ہم آہنگی اور ثقافتی تنوع قومی اتحاد اور فلاحی ریاست کی بنیاد ہیں، اور پوری قوم کو متحد ہو کر ترقی و خوشحالی کے لیے کردار ادا کرنا ہوگا۔