پاکستان اور ترکیہ کے درمیان عدالتی تعاون کے فروغ کے لیے مفاہمتی یادداشت پر دستخط

اسلام آباد:پاکستان اور برادر اسلامی ملک ترکیہ کے درمیان عدالتی تعاون کی یادداشت پر دستخط ہو گئے۔

تفصیلات کے مطابق عدالتی تعاون کے فریم ورک کی یادداشت پر دستخط کی تقریب اسلام آباد میں منعقد ہوئی ، تقریب میں سپریم کورٹ آف پاکستان اور آئینی عدالت کے ججز اور دیگر اعلیٰ حکام کے علاوہ جمہوریہ ترکیہ کی آئینی عدالت کے اعلیٰ سطح وفد کے ارکان بھی شریک ہوئے، تقریب کے آغاز میں دونوں ممالک کے قومی ترانے بجائے گئے۔

پاکستان کی جانب سے چیف جسٹس یحییٰ آفریدی اور ترکیے کی آئینی عدالت کےچیف جسٹس نےمعاہدے کے فریم ورک پر دستخط کیے۔

دونوں ممالک نے عدالتی تربیت اور بہترین طریقہ کار کے تبادلے اور مشترکہ ورکنگ گروپ کے قیام پر اتفاق کیا اور جدید ٹیکنالوجی کے ذریعے انصاف کی فراہمی بہتر بنانے پر زور دیا۔

اس موقع پر خطاب کرتے ہوئے چیف جسٹس یحییٰ آفریدی نے کہا کہ ترکیے کی آئینی عدالت کے اعلیٰ وفد کو پاکستان آمد پر خوش آمدید کہتے ہیں، ترک وفد کا دورہ دونوں ممالک کے درمیان برادرانہ اور تاریخی تعلقات کی علامت ہے۔

اپنےخطاب میں انہوں نےمزید کہا کہ مفاہمتی یادداشت دونوں ممالک کی عدلیہ کیلئے اہم ہے، عدالتی کارروائی میں مصنوعی ذہانت کے استعمال کے حوالے سے ترکیہ ایک مثال ہے، ہمیں ایک دوسرے کے عدالتی تجربات سے استفادہ کرنا ہے۔

دوسری جانب اس موقع پر خطاب کرتے ہوئے ترکیہ کی آئینی عدالت کے چیف جسٹس نے کہا کہ پاکستان آ کر بہت خوشی ہوئی، آج کا دن دونوں ملکوں کے عدالتی نظام کیلئے انتہائی اہم ہے، ہم اللہ کی حاکمیت پر یقین رکھتے ہیں، عدالتی نظام کو جدید خطوط پر استوار کرنا ناگزیر ہے۔