اسحاق ڈار کا جاپان اور پرتگال کے وزرائے خارجہ سے رابطہ، مشرقِ وسطیٰ اور دیگر امور پر تبادلہ خیال

اسلام آباد: نائب وزیراعظم و وزیر خارجہ سینیٹر اسحاق ڈار کا جاپان اور پرتگال کے وزرائے خارجہ کے درمیان ٹیلیفونک رابطہ ہوا ہے، جس میں دو طرفہ تجارت،تعاون، باہمی دلچسپی کے امور اور مشرقِ وسطیٰ کی صورتحا؛ل پر تبادلہ خیال کیا گیا ہے۔

وزارتِ خارجہ کے ترجمان کے دفتر سے جاری بیان کے مطابق نائب وزیراعظم و وزیر خارجہ سینیٹر اسحاق ڈار کو آج جاپان کے وزیر خارجہ توشیمیتسو موتیگی کی جانب سے ٹیلیفون کال موصول ہوئی ہے۔

گفتگو کے دوران دونوں رہنماؤں نے مشرقِ وسطیٰ اور وسیع تر خطے کی مجموعی صورتحال پر تبادلہ خیال کیا اور کشیدگی میں فوری کمی کی اہمیت پر زور دیا۔

نائب وزیراعظم و وزیر خارجہ نے خطے میں کشیدگی کے خاتمے، پائیدار امن اور استحکام کے لیے تمام اقدامات کی حمایت کے پاکستان کے عزم کا اعادہ کیا۔

دوسری جانب جاپانی وزیر خارجہ نے علاقائی امن و استحکام کے لیے مکالمے اور سفارتکاری کے فروغ میں پاکستان کے مثبت کردار کو سراہا اور اس کی حمایت کا اظہار کیا،دونوں رہنماؤں نے باہمی رابطے برقرار رکھنے پر اتفاق کیا۔

علاوہ ازاں اسحاق ڈار سے پرتگال کے وزیر مملکت برائے خارجہ امور پاؤلو رانجل نے ٹیلیفونک رابطہ کیا جس میں خطے کی بدلتی ہوئی صورتحال پر تبادلہ خیال کیا گیا۔

ترجمان کے مطابق ٹیلیفونک گفتگو کے دوران اسحاق ڈار نے خطے میں کشیدگی میں فوری کمی کی ضرورت پر زور دیتے ہوئے پائیدار امن و استحکام کے لیے پاکستان کی کوششوں کو اجاگر کیا۔