ایران نے پاکستان کےمجوزہ ’’اسلام آباداکارڈ‘‘ پر اپنے ردعمل سے آگاہ کردیا

تہران:مشرق وسطیٰ میں جاری کشیدگی کے خاتمے اور مذاکرات کیلئے پاکستان کی جانب سے امریکا اور ایران کو دیے گئے مجوزہ ’’اسلام آباد اکارڈ‘‘ پر تہران نے اسلام آباد کو اپنے ردعمل سے آگاہ کر دیا۔

ایرانی میڈیا رپورٹس کے مطابق تہران نے واضح کیا ہے کہ ماضی کے تجربات کی بنیاد پر وہ کسی بھی عارضی جنگ بندی کو قبول نہیں کرسکتے۔

میڈیا رپورٹس میں مزید کہا گیا ہے کہ ایران نےپیش کردہ مجوزہ منصوبے کے جواب میںسخت مؤقف اختیار کیا ہے کہ عارضی جنگ بندی جیسے اقدامات وقتی ہوتے ہیں جس کے دوران فریق خود کو جنگ کے لیے دوبارہ متحرک اور منظم کرلیتا ہے جس سے کشیدگی بڑھنے کا خدشہ ہوتا ہے۔

رپورٹس کے مطابق ایران نے واضح کیا ہے کہ وہ محض عارضی جنگ بندی کے بدلے آبنائے ہرمز کو دوبارہ کھولنے کے لیے تیار نہیں ہے،کیونکہ واشنگٹن مستقل جنگ بندی کے لیے سنجیدہ نظر نہیں آتا، اسی لیے ایران عارضی نوعیت کے کسی معاہدے کے بدلے اہم بحری گزرگاہ کو کھولنے پر آمادہ نہیں۔

ذرائع کے مطابق ایران نے اس مجوزہ منصوبے کے جواب میں دس نکات شامل ہیں جن میں خطے میں جاری تمام تنازعات کے خاتمے، آبنائے ہرمز میں محفوظ گزرگاہ کے لیے باقاعدہ طریقہ کار، اقتصادی پابندیوں کے خاتمے اور جنگ سے متاثرہ علاقوں کی تعمیر نو جیسے مطالبات شامل ہیں۔

ایران کی جانب سے دیے گئےجواب میں مزیدکہا گیا ہے کہ ایران صرف اسی صورت کسی معاہدے پر آمادہ ہوگا جب جنگ کا مکمل خاتمہ یقینی بنایا جائے اور مستقبل میں دوبارہ جنگ کا راستہ مکمل طور پر بند کردیا جائے۔

دوسری جانب امریکا کی جانب سے اس ردعمل پر باضابطہ موقف سامنے نہیں آیا البتہ امریکی صدر ڈونلڈ ٹرمپ اب سے کچھ دیر بعد پریس کانفرنس کریں گے۔