اقوام متحدہ سمیت مختلف ممالک کا امریکہ اور ایران کے درمیان جنگ بندی کا خیرمقدم،پاکستان کے مثبت کردار کی تعریف

ویب ڈیسک:اقوام متحدہ سمیت عالمی برادری نے امریکہ اور ایران کے درمیان جنگ بندی کا خیرمقدم کیا ہے ۔عالمی برادری نے اپنے پیغامات میں پاکستان کا شکریہ ادا کرتے ہوئے کہا کہ پاکستان نے دنیا کو ایک بڑی تباہی سے بچا لیا۔

تفصیلات کے مطابق اقوامِ متحدہ کے سکریٹری جنرل انتونیو گوتریس نے امریکہ اور ایران کے درمیان جنگ بندی کا خیر مقدم کرتے ہوئے فریقین پر مشرقِ وسطیٰ میں دیرپا امن کے قیام کے لیے کام کرنے پر زور دیا ہے ۔

رپورٹس کے مطابق ترجمان اسٹیفن ڈوژارک نے بتایا کہ سکریٹری جنرل گوتریس نے مشرقِ وسطیٰ کے حالیہ تنازع کے تمام فریقوں سے مطالبہ کیا ہے کہ وہ بین الاقوامی قانون کے تحت اپنی ذمہ داریوں کو پورا کریں اور جنگ بندی کی شرائط پر عمل درآمد کریں تاکہ خطے میں ایک جامع اور پائے دار امن کی راہ ہموار ہو سکے۔

اسی طرح جرمنی ،ملائیشیا، نیوزی لینڈ ، آسٹریلیا ،عمان ،یوکرین ،جاپان ،انڈونیشیا نے اپنے پیغامات میں پاکستان کی سفارت کاری کو خراجِ تحسین پیش کرتے ہوئے کہا کہ پاکستان کی کوششوں سے عالمی تباہی ٹل گئی ۔

عالمی میڈیا کے مطابق وزیرِ اعظم پاکستان اور فیلڈ مارشل سید عاصم منیر کی کوششوں سے جنگ بندی ممکن ہوئی۔ عالمی رہنماؤں کی جانب سے شکریہ کے پیغامات میں کہا گیا کہ پاکستان نے خاموش مگر مؤثر سفارتی کردار ادا کیا ۔

جاپان اور مصر نے جنگ بندی کی حمایت کرتے ہوئے خلیجی ریاستوں کی سلامتی پر بھی زوردیا۔قازقستان کے صدر نے وزیرِ اعظم شہباز شریف کی ثالثی میں ہونے والے معاہدے کو خراج تحسین پیش کیا ۔پاکستان میں برطانوی ہائی کمشنر جین میریٹ نے ایکس پیغام میں پاکستان کے اہم سفارتی کردار پر 'تھینک یو پاکستان' لکھا۔