راولا کوٹ پولیس کی کامیاب کارروائی، بھارتی ایجنسی ’را‘ کیلئے کام کرنے والا خفیہ ایجنٹ گرفتار

مظفر آباد: آزاد کشمیر کے ضلع راولا کوٹ میں پولیس نے کامیاب کارروائی کرتے ہوئے بھارتی خفیہ ایجنسی ’را‘ کے ایجنٹ کو گرفتار کر لیا،ایجنٹ حساس تنصیبات کی ریکی کرنے سمیت ان کی ویڈیوز اور لوکیشنز دشمن تک پہنچاتا رہا تھا۔

تفصیلات کے مطابق انسپکٹر جنرل(آئی جی )آزاد کشمیر نے جمعرات کو مظفرآباد میں ایک اہم پریس کانفرنس کرتے ہوئے بتایا کہ عرفان نامی یہ شخص دشمن ملک کی ایجنسی کے لیے جاسوسی کے فرائض سرانجام دے رہا تھا اور اسے پولیس کی مستعدی کے باعث بروقت قابو کر لیا گیا ہے،اس کارروائی کے ذریعے آزاد کشمیر پولیس نے دشمن کے ایک پورے نیٹ ورک کو بے نقاب کرنے کا دعویٰ کیا ہے۔

دوران پریس کانفرنس آئی جی پولیس لیاقت علی ملک نے تفصیلات بتاتے ہوئے کہا کہ گرفتار ملزم عرفان سوشل میڈیا کے ذریعے دشمن کے ساتھ رابطے میں تھا اور حساس تنصیبات کی ریکی کرنے سمیت ان کی ویڈیوز اور لوکیشنز دشمن تک پہنچاتا رہا تھا۔

آئی جی لیاقت ملک نے تشویش کا اظہار کرتے ہوئے بتایا کہ ملزم نہ صرف معلومات فراہم کرتا تھا بلکہ معصوم بچوں کو پیسوں کا لالچ دے کر تخریبی کارروائیوں کے لیے تیار کرنے کی کوششوں میں بھی مصروف تھا۔

آئی جی نے مزیدکہا کہ ملزم شہریوں کو نشانہ بنانے کی منصوبہ بندی میں بھی ملوث رہا، تاہم پولیس کی بروقت کارروائی نے ممکنہ خطرہ ٹال دیا، ایسے عناصر کے خلاف بلاامتیاز کارروائیاں جاری رہیں گی۔

ان کا کہنا تھا کہ آزاد کشمیر کی سرزمین کا تقدس کسی صورت پامال نہیں ہونے دیا جائے گا اور سکیورٹی ادارے خطے کے امن و استحکام کے لیے ہر ممکن اقدامات جاری رکھیں گے۔

پریس کانفرنس کے دوران ملزم عرفان کا اعترافی بیان بھی میڈیا کے سامنے پیش کیا گیا،ملزم نے اعتراف کیا کہ اسے انٹرنیٹ کے ذریعے ورغلایا گیا تھا۔ عرفان کا کہنا تھا کہ مجھے آن لائن نوکری کی پیشکش کی گئی تھی، جس کے بعد وہ اس کام میں ملوث ہوا۔

پولیس حکام کا کہنا ہے کہ ملزم سے مزید تفتیش جاری ہے تاکہ اس نیٹ ورک سے جڑے دیگر افراد تک بھی پہنچا جا سکے۔