فیلڈ مارشل عاصم منیر اوروزیر داخلہ محسن نقوی کا  تین دورہ ایران مکمل،ایرانی قیادت سے اہم ملاقاتیں

راولپنڈی: چیف آف ڈیفنس فورسز (سی ڈی ایف) فیلڈ مارشل سید عاصم منیر اوروزیر داخلہ محسن نقوی کا ایران کا تین روزہ دورہ مکمل ہوگیا ہے ۔دورے کے دوران فیلڈ مارشل کی ایران کے صدر ڈاکٹر مسعود پیزشکیان سے ملاقات ہوئی۔

پاک فوج کے شعبہ تعلقات عامہ(آئی ایس پی آر) کے مطابق دورے میں فیلڈ مارشل سید عاصم منیر کی پارلیمنٹ کے سپیکر محمد باقر قالیباف اور وزیر خارجہ عباس عراقچی سے الگ الگ ملاقات بھی ہوئی ۔

ترجمان کے مطابق فیلڈ مارشل عاصم منیرنے خاتم الانبیاء ہیڈ کوارٹرز کے دورے میں کمانڈر میجر جنرل علی عبداللہی سے بھی ملاقات کی۔

ملاقاتوں میں خطے میں پائیدار امن ،علاقائی سلامتی اور استحکام کے فروغ پر گفتگو ہوئی ۔فیلڈ مارشل نے ملاقاتوں میں سفارتی روابط، کشیدگی میں کمی اور مسائل کے پرامن حل کی ضرورت پر زور دیا۔

ترجمان نے مزید بتایا کہ فیلڈ مارشل نے ایرانی قیادت اور ایرانی عوام کی جانب سے گرمجوشی سے کی جانے والی مہمان نوازی کو سراہتے ہوئے دونوں ممالک کے درمیان تاریخی اور برادرانہ تعلقات کو مزید مضبوط بنانے کی پاکستان کی خواہش کا اعادہ کیا۔

آئی ایس پی آر کا کہنا تھا کہ ایران کا دورہ خطے میں امن، استحکام اور خوشحالی کو فروغ دینے کیلئے پاکستان کے غیر متزلزل عزم کا عکاس ہے۔