افغان طالبان رجیم کانیافوجداری ضابطہ،ماہرین نے منظم جبراورآمریت کی علامت قرار دے دیا

کابل: افغانستان میں طالبان رجیم کے نافذ کردہ نئے فوجداری ضابطے پر عالمی سطح پر تشویش کی لہر دوڑ گئی ہے، جسے ماہرین نے منظم جبر اور آمریت کی علامت قرار دیا ہے۔

افغان میڈیا آمو ٹی وی اور کابل ناؤ کے مطابق اقوام متحدہ کے انسانی حقوق کے ماہرین نے طالبان کے نئے حکم نامے پر گہری تشویش کا اظہار کرتے ہوئے اسے فوری طور پر واپس لینے کا مطالبہ کیا ہے۔ ماہرین نے اس فوجداری ضابطے کو بین الاقوامی قوانین کے منافی قرار دیا ہے۔

میڈیا رپورٹس کے مطابق ضابطے میں جرائم کی مبہم تشریح اور ججز کو دیے گئے وسیع اختیارات کے باعث بے گناہ افراد، خواتین، اقلیتوں اور اختلاف رائے رکھنے والوں کو نشانہ بنائے جانے کا خدشہ ہے۔

دوسری جانب انسانی حقوق کے ماہرین نے سرعام کوڑے مارنے جیسے اقدامات کو غیر قانونی اور انسانی وقار کے منافی قرار دیتے ہوئے ان کے خاتمے پر زور دیا ہے۔

اس حوالے سےعالمی ماہرین کامزید کہنا ہے کہ طالبان کا نام نہاد فوجداری ضابطہ اصلاحات کے نام پر معاشرے کو خاموش کرنے کا ایکظالمانہ حربہ ہے، جس کے تحت شفاف حکمرانی یا عوامی رائے کے بجائے جبراً فیصلے مسلط کرنے کی روایت کو فروغ دیا جا رہا ہے۔