ایران آبنائے ہرمز کو دوبارہ بند کرنا چاہتا ہے لیکن اب وہ ہمیں بلیک میل نہیں کرسکتا ،ٹرمپ

واشنگٹن ڈی سی:امریکی صدر ڈونلڈ ٹرمپ کا کہنا ہے کہ ایران کے ساتھ اچھی بات چیت ہورہی ہے، جس میں امریکا نے سخت مؤقف اپنا رکھا ہے۔ انہوں نے کہا کہ ایران آبنائے ہرمز کو دوبارہ بند کرنا چاہتا ہے لیکن اب وہ ہمیں بلیک میل نہیں کرسکتا ہے۔

وائٹ ہاؤس میں صدارتی حکم نامے پر دستخط کی تقریب سے خطاب کرتے ہوئے صدر ٹرمپ کا کہنا تھا کہ ہم نے ایران کی اعلیٰ قیادت، نیوی اور ایئرفورس کو مکمل طور پر تباہ کر دیا ہے۔

امریکی صدر ڈونلڈ ٹرمپ نے کہا کہ ہم ایران سے اب بھی بات چیت کر رہے ہیں، معاہدے کے حوالے سے جو بھی صورتِ حال ہوگی وہ دن کے آخر تک واضح ہوجائے گی۔

ٹرمپ کا کہنا تھا کہ ایران میں قاسم سلیمانی کو نشانہ بنایا گیا، رجیم کی قیادت کو ختم کیا گیا، سلیمانی بہت سے امریکی فوجیوں کے معذور ہونے اور ہلاکتوں کا ذمہ دار تھا، ایران کے حوالے سے آج دن کے اختتام تک اہم معلومات کا اعلان کروں گا۔

اسپین کے حوالے سے گفتگو کرتے ہوئے امریکی صدر کا کہنا تھا کہ اسپین کی حالت دیکھ کر افسوس ہوتا ہے، اسپین کی معیشت کمزور ہوچکی ہے وہ نیٹو میں بھی حصہ نہیں ڈالتے، اسپین اپنے دفاع پر جی ڈی پی کا 5 فیصد خرچ کرنے میں ناکام رہا۔

ٹرمپ نے مزید کہا کہ امریکا کو اپنی کارروائیوں کے لیے کسی کی اجازت کی ضرورت نہیں، ہمیں ان کی اجازت کی ضرورت نہیں اگر ہم چاہیں تو ہم ان کے اڈوں کو استعمال کرسکتے ہیں، اسپین کے پاس ایسا کچھ نہیں جس کی ہمیں ضرورت ہو۔

ٹرمپ کا کہنا تھا کہ طبی شعبے میں اصلاحات لارہے ہیں،  ادویات کی قیمتوں میں 50 سے 80 فیصد تک کمی ہوئی ہے،  امریکا میں منشیات کی اسمگلنگ میں کمی آئی ہے۔