وزیر مملکت برائے خزانہ نے ڈیزل کے بعد پٹرول کی قیمتوں میں بھی کمی کا عندیہ دے دیا

کراچی:وزیرمملکت برائے خزانہ بلال اظہر کیانی نے ڈیزل کی قیمتوں میں کمی کے بعد بعد پیٹرول کی قیمت میں بھی کمی کا عندیہ دے دیا۔

تفصیلات کے مطابق وزیر مملکت نے کراچی چیمبر آف کامرس میں میڈیا سے بات کرتے ہوئے کہا کہ آئندہ جمعہ کو پیٹرول کی قیمتوں میں بھی کمی کا فیصلہ کیا جائے گا، یہ کمی عالمی قیمتوں کو مدنظر رکھتے ہوئے کی جائے گی۔

میڈیا سے گفتگو میں ان کا کہنا تھا کہ جنگ بندی سے نہ صرف پاکستان بلکہ دنیا بھر کی معیشتوں کو فائدہ پہنچا ہے، جنگ بندی کو معیشت میں بہتری کا سبب بنایا جائے گا۔

انہوں نے کہا کہ پاکستان 4سال بعد عالمی یوروبانڈ مارکیٹ میں شمولیت کے قابل بنا،انہوں نے کہا کہ گذشتہ سال کے بجٹ میں 37اے کی شق میں ترامیم کرکے اختیارات میں کمی کی گئی، انہوں نے کہا کہ بجٹ کی آمد ہے، اس ضمن میں تاجر برادری سے مشاورت رہتی ہے۔

ان کا کہنا تھا کہ کراچی پاکستان کی معاشی سرگرمیوں کی شہ رگ ہے، دورہ کراچی کا مقصد معاشی ترقی کی راہ میں حائل مسائل کو حل کرنا ہے،انہوں نے کہا کہ فروری 2024 سے آج تک حکومت کا معاشی استحکام کا سفر تھا جس میں افراطِ زر میں کمی، زرمبادلہ ذخائر میں اضافہ، آئی ایم ایف پروگرام میں شمولیت جیسے اقدامات کیے گئے۔