ایران اور امریکا کے مابین مذاکرات کل اسلام آباد میں ہونگے،امریکی وفدآج پہنچے گا

اسلام آباد: پاکستان کی ثالثی و میزبانی میں ہونے والے ایران امریکہ مذاکرات کا دوسرا دور کل ہو گا جس میں شرکت کیلئے امریکی وفد آج اسلام آباد پہنچے گا،جبکہ ایرانی وفد کی آمد کل متوقع ہے۔

تفصیلات کے مطابق اس حوالے سے ذرائع کا کہنا ہے کہ مذاکرات کو حتمی شکل دے دی گئی، دونوں ممالک پاکستان آنے پر آمادہ ہیں۔
ذرائع کے مطابق پاکستان نے فریقین سے رابطہ کر لیا، امریکی وفد آج پاکستان پہنچ جائے گا، ایرانی وفد کی بھی جلد پاکستان آمد متوقع ہے۔

دوسری جانب ایران کی وزارت خارجہ کے ترجمان اسماعیل بقائی نے کہا ہے کہ پاکستان نے امن کے لیے اپنا کردار ادا کیا مگر امریکا پر اعتماد نہیں، مذاکرات کے دوسرے دور میں شرکت کا تاحال کوئی ارادہ نہیں، وفد پاکستان نہیں جائے گا۔

 ایرانی وزارت خارجہ کے ترجمان اسماعیل بقائی کے مطابق موجودہ حالات مزید بات چیت کے لیے سازگار نہیں،میڈیا سے گفتگو میں انہوں نے کہا کہ امریکہ کے حالیہ اقدامات سے واضح ہوتا ہے کہ وہ سفارتی عمل کو آگے بڑھانے میں سنجیدہ نہیں۔

ان کے مطابق امریکہ نے حال ہی میں ایران کے خلاف جارحانہ اقدامات کیے ہیں اور جنگ بندی معاہدے کی خلاف ورزی بھی کی ہے۔ترجمان اسماعیل بقائی نے الزام عائد کیا کہ امریکہ اپنے تجربات سے کوئی سبق نہیں سیکھ رہا اور اس کا طرزِ عمل کسی مثبت نتیجے تک نہیں پہنچ سکتا۔