پاکستان مصر مشترکہ فوجی مشق "تھنڈر ٹو" کامیابی سے مکمل،افواج کااعلیٰ پیشہ ورانہ مہارت اور عملی صلاحیتوں کا مظاہرہ 

راولپنڈی: پاکستان اور مصر کی افواج کے درمیان انسداد دہشت گردی آپریشنز پر مبنی مشترکہ فوجی مشق "تھنڈر ٹو" پاکستان کے علاقے چیرات میں کامیابی سے منعقد ہوئی۔

پاک فوج کے شعبہ تعلقات عامہ(آئی ایس پی آر) کے مطابق دو ہفتوں پر محیط اس مشق کا مقصد مشترکہ تربیت کے ذریعے انسداد دہشت گردی سے متعلق مشقوں، طریقہ کار اور تکنیکوں کو بہتر بنا کر باہمی ہم آہنگی کو فروغ دینا تھا۔

ترجمان کے مطابق مشق میں پاک فوج کے اسپیشل سروسز گروپ (ایس ایس جی) اور مصری اسپیشل فورسز کے دستوں نے بھرپور شرکت کی اور دورانِ مشق اعلیٰ پیشہ ورانہ مہارت اور عملی صلاحیتوں کا مظاہرہ کیا۔

ترجمان پاک فوج نے مزید بتایا کہ مشق اختتامی تقریب میں جنرل آفیسر کمانڈنگ، اسپیشل سروسز گروپ نے بطور مہمان خصوصی شرکت کی، جبکہ مصری پیراٹروپرز کے کمانڈر میجر جنرل محمد سعد عبدالرزاق اور مصر کے دفاعی اتاشی بھی اس موقع پر موجود تھے۔

ترجمان آئی ایس پی آر کے مطابق یہ مشق دونوں برادر ممالک کے درمیان دیرینہ اور تاریخی عسکری تعلقات کو مزید مستحکم بنانے کا باعث بھی بنی۔