وزیرخارجہ اسحا ق ڈار سے چینی سفیر کی ملاقات، علاقائی و عالمی صورتحال پر تبادلہ خیال

اسلام آباد: پاکستان میں چین کے سفیر جیانگ زائی ڈونگ نے آج نائب وزیراعظم و وزیر خارجہ سینیٹر اسحاق ڈار سے ملاقات کی ہے،ملاقات کے دوران تازہ ترین علاقائی صورتحال پر تفصیلی تبادلہ خیال کیا گیا۔

دوران ملاقات چینی سفیر نے خطے اور اس سے باہر پائیدار امن و استحکام کے لیے امریکہ اور ایران کے درمیان روابط کو فروغ دینے میں پاکستان کی مسلسل کوششوں کو سراہتے ہوئے مکمل حمایت کا اظہار کیا۔

ملاقات میں نائب وزیراعظم و وزیر خارجہ اسحاق ڈار نے پاکستان اور چین کے درمیان آل ویدر اسٹریٹجک کوآپریٹو پارٹنرشپ کے عزم کا اعادہ کیا۔

دونوں رہنماؤں نے دوطرفہ تعلقات کی مضبوطی کو اجاگر کیا اور دونوں ممالک کے درمیان اعلیٰ سطحی تبادلوں کے تسلسل کی اہمیت پر زور دیا۔