امریکا کے ساتھ مجوزہ مذاکرات میں شرکت کا حتمی فیصلہ تاحال نہیں ہوا،ایران

تہران :ایران کی وزارت خارجہ کی جانب سے جاری بیان میں کیا گہا ہے کہ اسلام آباد میں امریکا کے ساتھ ہونےوالے مجوزہ مذاکرات میں شرکت کا حتمی فیصلہ تاحال نہیںہو سکا۔

تفصیلات کے مطابق ترجمان ایرانی وزارت خارجہ اسماعیل بقائی نے ایرانی نیوزچینل سے گفتگو میں ایرانی جہازوں پر امریکا کی جارحیت سے متعلق کہا کہ ایرانی بحری جہازوں اور کھلے سمندروں میں تجارت کو نشانہ بنانا بین الاقوامی قوانین کی سنگین خلاف ورزی، سمندری قزاقی اور ریاستی دہشت گردی کے مترادف ہے۔

ایرانی سرکاری نشریاتی ادارے نے وزارت خارجہ کے حوالے سے بتایا ہے کہ امریکا کے ساتھ پاکستان میں ہونے والے ممکنہ امن مذاکرات میں شرکت کے بارے میں ابھی تک کوئی حتمی فیصلہ نہیں کیا گیا۔

بیان میں وزرات خارجہ کا کہنا ہے کہ اس تاخیر کی وجہ امریکی بیانات اور اقدامات میں تضاد اور غیر واضح رویہ ہے۔ حکام کے مطابق فیصلہ اسی صورت میں ہوگا جب مذاکرات نتیجہ خیز ثابت ہونے کا امکان ہو۔

بیان میں ترجمان نے امریکا پر ایران کے عدم اعتماد کو اجاگر کرتے ہوئے کہا کہ ایرانی بحری جہازوں پر حملے سمندری قزاقی اور ریاستی دہشت گردی کے مترادف ہیں۔ ان کے مطابق جب ان تمام اقدامات کو یکجا دیکھا جائے تو امریکا کی نیت اور طرزِ عمل پر سنجیدہ سوالات اٹھتے ہیں۔

ترجمان اسماعیل بقائی نے کہا کہ ایران ابتدا ہی سے امریکا پر اعتماد نہیں کرتا، ان کے مطابق 40 روزہ دفاعی مرحلے کے دوران مخالف فریق اپنے کسی بھی مقصد میں کامیاب نہیں ہو سکا۔

انہوں مزید کہا کہ اگرچہ اس دوران متعدد حملے کیے گئے اور ایران کو نقصان پہنچا، حتیٰ کہ رہنماؤں اور کمانڈرز کو بھی نشانہ بنایا گیا، تاہم عوام اور مسلح افواج کی مزاحمت کے باعث مخالفین اپنے اہداف حاصل نہیں کر سکے۔

ایرانی وزارتِ خارجہ کے ترجمان نے یہ بھی کہا کہ پاکستان میں ہونے والے مذاکرات میں ایران کی شرکت اس کے ذمہ دارانہ مؤقف کی عکاس ہے۔ تاہم انہوں نے زور دیا کہ سفارتی عمل کا نتیجہ خیز ہونا ضروری ہے۔

 ان کے مطابق ایران اس وقت تک کوئی حتمی فیصلہ نہیں کرے گا جب تک یہ واضح نہ ہو جائے کہ مذاکرات عملی طور پر نتیجہ دے سکتے ہیں،انہوں نے واضح کیا کہ ایران کی جانب سے اسلام آباد میں امریکا کے ساتھ مذاکرات میں شرکت کا تاحال کوئی فیصلہ نہیں کیا گیا۔

ایرانی وزارتِ خارجہ کے ترجمان کے مطابق بطورسفارتی ادارہ ان کی ذمے داری ہے کہ وہ اپنی قوم کے سامنے شفاف انداز میں بات کریں، ان کہنا تھاکہ عالمی میڈیا کا جائزہ لینے سے یہ بات سامنے آتی ہے کہ کئی اداروں نے اس معاملے پرغلط اطلاعات نشرکی ہیں۔ انہوں نے مزید کہا کہ جب بھی کوئی حتمی فیصلہ کیا جائے گا تو اس سے عوام کو ضرور آگاہ کیا جائے گا۔

خیال رہے کہ اس سے قبل پاکستان کے وزیرِ اطلاعات عطا اللہ تارڑ نے سماجی رابطے کی ویب سائٹ ’ایکس‘ پر بیان جاری کرتے ہوئے کہا کہ اسلام آباد میں ممکنہ امن مذاکرات کے لیے ایران کی باضابطہ تصدیق کا انتظار کر رہا ہے اور اس حوالے سے سفارتی رابطے جاری ہیں۔