وفاقی وزیر ریلوے کی زیر صدارت ریلوے روٹس کی اپ گریڈیشن منصوبے کے حوالے سے جائزہ اجلاس

لاہور:وفاقی وزیر ریلوے حنیف عباسی اورسینئر صوبائی وزیر پنجاب مریم اورنگزیب  کی زیر صدارت ریلوے روٹس کی اپ گریڈیشن سے متعلق اہم جائزہ اجلاس منعقد ہوا، جس میں پنجاب کی 8 اہم ریلوے لائنوں اور روٹس کی اپ گریڈیشن پر پیش رفت کا تفصیلی جائزہ لیا گیا۔

تفصیلات کے مطابق اجلاس میں لاہور سے راولپنڈی فاسٹ ٹرین پراجیکٹ پر جاری پیش رفت کا بھی خصوصی طور پر جائزہ لیا گیا۔ بریفنگ میں بتایا گیا کہ وزیر اعلیٰ پنجاب مریم نواز شریف کی ہدایات کے مطابق دنیا کے بہترین ریلوے ماڈلز کا مطالعہ کرنے کے بعد ان روٹس کی اپ گریڈیشن کی جا رہی ہے۔

دوراناجلاس کو بتایا گیا کہ وزیر اعلیٰ پنجاب مریم نواز کے وژن کے تحت یہ ریلوے روٹس پورے پنجاب کو باہم منسلک کریں گے جبکہ منصوبے کے تحت 1600 کلومیٹر طویل ریلوے ٹریکس کو جدید خطوط پر استوار کیا جائے گا۔

علاوہ ازاں بریفنگ کے مطابق شاہدرہ تا نارووال، نارووال تا سیالکوٹ اور لالہ موسیٰ، ملکوال، سرگودھا روٹس کی اپ گریڈیشن منصوبے کا حصہ ہیں۔ اس کے علاوہ فیصل آباد تا چک جھمرہ اور شاہین آباد، شورکوٹ، جھنگ روٹس کی بہتری بھی منصوبے میں شامل ہے۔

اجلاس کے شرکا کو مزید بتایا گیا کہ شیخوپورہ، جڑانوالہ، شورکوٹ، رائیونڈ، پاکپتن، لودھراں، کوٹ ادو اور ڈیرہ غازی خان کے ریلوے روٹس کی اپ گریڈیشن بھی پراجیکٹ کا حصہ ہے۔

سینئر صوبائی وزیر مریم اورنگزیب نے کہا کہ منصوبے سے 8 کروڑ سے زائد شہری مستفید ہوں گے جبکہ ریلوے روٹس کی اپ گریڈیشن سے شہریوں کو محفوظ، معیاری اور جدید سفری سہولیات فراہم کی جائیں گی۔اسی طرح اجلاس میں شاہدرہ تا نارووال سیکشن کی اپ گریڈیشن کا بھی تفصیلی جائزہ لیا گیا۔

دوران مریم اورنگزیب نے کہا کہ وزیر اعلیٰ پنجاب کی ہدایات کی روشنی میں ان 8 روٹس پر برجز، ٹیلی کمیونیکیشن سسٹم، اسٹیشن بلڈنگز، سمال مشینری اور کراس برجز کی مکمل تبدیلی اور اینڈ ٹو اینڈ اپ گریڈیشن کی جائے گی۔

اجلاس میں سب اربن ریلوے کے لیے کیے جانے والے اقدامات پر بھی غور کیا گیا۔ سینئر صوبائی وزیر نے کہا کہ ریلوے اپ گریڈیشن پراجیکٹ وزیر اعلیٰ پنجاب مریم نواز شریف کے وژن کا حصہ ہے اور ان کی واضح ہدایات ہیں کہ اپ گریڈیشن کے کام کو مقررہ وقت کے اندر مکمل کیا جائے۔